Խոյ համայնքում առաջին անգամ անցկացվեց ֆորում՝ «Հնարավորություններ և մարտահրավերներ կանանց համար» խորագրի ներքո

Նոյեմբերի 15-ին Խոյ համայնքում առաջին անգամ անցկացվեց ֆորում՝ նվիրված գյուղական բնակավայերում ապրող կանանց հնարավորություններին և մարտահրավերներին։ 

Բացելով ֆորումը, որը կազմակերպել էր Խոյի ավագանու անդամ, «Կանայք կանանց համար» մենթորության նախագծի մասնակից մենթի, ՄԱԶԾ սոցիալական նորարարության ծրագրի դրամաշնորհառու Լուսինե Գրիգորյանը՝ իր խոսքում նշել է, որ ֆորումի նպատակը բաց միջավայր ստեղծելն է, որտեղ կանայք կկարողանան կիսվել իրենց գաղափարներով, առաջադրանքներով, խնդիրներով և լուծումներով, որպեսզի միասին գտնեն նոր հնարավորություններ՝ բարձրացնելու կանանց մասնակցությունը համայնքային կառավարման մեջ։ 

Սա անհրաժեշտ քայլ է համայնքի համար՝ ստեղծելու մի մշակույթ, որտեղ յուրաքանչյուր կին, անկախ իր տարիքից, սոցիալական դիրքից կամ կրթությունից, ունենում է հավասար հնարավորություններ՝ գործելու և որոշումներ կայացնելու։ 

Լուսինե Գրիգորյանը շուրջ մեկ տարի մասնակցել է ՄԱԿ-ի Զարգացման ծրագրի (ՄԱԶԾ)՝ «Կանայք կանանց համար» մենթորության ձևաչափով նախագծին և վերջում հնարավորություն ստացել իր գաղափարն իրականացնել՝ ստանալով դրամաշնորհ։ «Այսօր այստեղ կանգնած եմ այն համոզմամբ, որ կանանց դերը մեր համայնքում, ինչպես նաև Հայաստանում, առհասարակ, ունի առանցքային նշանակություն, և այսօր, ավելի քան երբևէ, պետք է բարձրաձայնել ու ցուցադրել մեր աջակցությունը կանանց ակտիվ մասնակցությանը հասարակական կյանքում և այսօրվա ֆորումը դրա վառ ապացույցն է և հուսամ՝ լավագույն մեկնարկը», - բացման խոսքում նշել է Լուսինե Գրիգորյանը։ 

Ֆորումի մասնակիցներին ողջույնի խոսքով դիմել է նաև Խոյի համայնքապետարանի աշխատակազմի քարտուղար Աննա Առաքելյանը, նշելով, որ ուրախ է համայնքում նման հարթակ ստեղծելու համար, որը լրացուցիչ խթան կդառնա կանանց ակտիվացման համար։ ՄԱԶԾ Գենդերային հավասարության պորտֆելի ղեկավար Ժաննա Հարությունյան իր խոսքում ևս ընդգծել է գյուղական բնակավայրերում կանանց հիմնախնդիրները համայնքային օրակարգ բերելու կարևորությունը։ Ողջույնի խոսքին հաջորդել է պանելային քննարկում, որը վարել է ՀՀ ՏԿԵ նախարարի օգնական, «Կանայք կանանց համար» մենթորության նախագծի մասնակից մենթոր Լիանա Հովհաննիսյանը։ Քննարկման ընթացքում կանանց քաղաքական, սոցիալական քաղաքացիական ակտիվության խնդիրների և դրանց լուծումների մասին խոսել են ՀՀ ՏԿԵ նախարարության Տեղական ինքնակառավարման քաղաքականության վարչության աշխատակից Անժելա Փիլոյանը, ՀՀ Արմավիրի մարզպետի աշխատակազմի առողջապահության և սոցիալական ոլորտի հարցերի վարչության պետ Ասթինե Ապիտոնյանը, «Արմավիրի զարգացման կենտրոն» ՀԿ նախագահ Նաիրա Առաքելյանը, ինչպես նաև Բաղրամյան համայնքի ավագանու անդամ, Լեռնագոգի միջնակարգ դպրոցի տնօրեն Ռուզաննա Մկրտչյանը։ «Հասարակական կյանքում և որոշումների կայացմանը կանանց ակտիվ մասնակցության ապահովումը շարունակում է մնալ մեծ մարտահրավեր, հատկապես գյուղական բնակավայրերում: Կանայք հաճախ են բախվում խոչընդոտների, որոնք սահմանափակում են համայնքներում ղեկավար դերեր ստանձնելու, կամ պարզապես ակտիվ մասնակցություն դրսևորելու իրենց հնարավորությունները»,- քննարկման ժամանակ իր խոսքում նշել է Նաիրա Առաքելյանը: 

Ասթինե Ապիտոնյանը նկատել է, որ կանայք գյուղական բնակավայրերում հաճախ ավելի շատ պարտականություններ ունեն ընտանիքի և աշխատանքի նկատմամբ, որպեսզի նրանց համար ավելի դյուրին դառնա բիզնես կամ աշխատանքային գործունեություն ծավալելն անհրաժեշտ է խթանել փոքր բիզնեսով զբաղվելու ծրագրերը։ 

ՏԿԵ նախարարության ներկայացուցիչը իր խոսքում ասել է, որ Հայաստանում վերջին տարիներին քաղաքական համակարգում կանանց թիվն աճում է, բայց դեռևս համեմատաբար ցածր մակարդակում է։ Այս ամենի վրա ազդել են տարբեր բարեփոխումներ, այդ թվում՝ ընտրական համակարգի փոփոխությունները, որոնք հնարավորություն են տալիս ավելացնել կանանց ներկայացուցիչների թիվը տեղական ինքնակառավարման մարմիններում։ Օրինակ, ավագանու ընտրություններում որոշակի չափով պարտադիր քվոտաներ նպաստում են կանանց ակտիվ մասնակցության խթանմանը։ Իսկ Բաղրամյան համայնքի ավագանու անդամ Ռուզաննա Մկրտչյանը ներկայացրելով իր փորձը՝ նշել է, որ համայնքում ակտիվ կին լինելն է իրեն տարել նաև համայնքային որոշումներ կայացնելու, ՏԻՄ-ի մաս դառնալու ուղով։ «Դպրոցի տնօրեն լինելու հանգամանքը հրաշալի հնարավորություն է կրթական միջավայրում նոր նախաձեռնություններ խթանելու, կամ էլ աջակցություն ցուցաբերել այն ուսուցիչներին, աշակերտներին, ծնողներին, ովքեր ունեն խնդիրներ, իրենց խրախուսել, որպեսզի ակտիվ լինեն համայնքային կյանքում»։ 

ԼՂ-ից բռնի տեղահանման արդյուքնում Արմավիրի մարզում բնակություն են հաստատել ավելի քան 13 հազար տեղահանված, նրանցից շուջ 1000-ը՝ ապրում են Խոյ համայնքի տարբեր բնակավայրերում և 50 տոկոսից ավելին կանայք են։ Տեղահանված կանանց ինտեգրումը համայնքներում ևս կարևոր հարց է, որի շուրջ իրենց մոտեցումների մասին խոսել են պանելային քննարկման մասնակիցները։ 

Համայնքի տարբեր ոլորտներում գործունեություն ծավալող ավելի քանի 80 կանայք՝ այդ թվում ԼՂ-ից բռնի տեղահանվածներ, հնարավորություն ունեցան իրենց գիտելիքները խորացնել պանելային քննարկմանը հաջորդած երեք տարբեր թեմաներով աշխատարանային քննարկումներում։ Մասնակիցները հնարավորություն են ստացել նոր հմտություններ և գիտելիքներ ձեռք բերել հանրային խոսքի, մեդիագրագիտության և համայնքային մասնակցության վերաբերյալ։ 

Ֆորումը միտված էր համայնքում որոշումների կայացման գործում բարձրացնել կանանց դերը՝ խթանելով տեղացի և ԼՂ-ից բռնի տեղահանված կանանց անկաշականդ ինքնաարտահայտմանը և համագործակցությանը: Կայացած ֆորումի արդյունքները հաստատում են, որ միայն միասնական աշխատանքով և համագործակցությամբ հնարավոր կլինի հաղթահարել առկա մարտահրավերներն ու ապահովել ավելի լավ ապագա Խոյի համայնքի բոլոր բնակիչների համար։ 

«Կանայք կանանց համար» մենթորության նախագծն իրականցվում է ՄԱԿ-ի Զարգացման ծրագրի՝ Միացյալ Թագավորության Լավ կառավարման հիմնադրամի ֆինանսավորմամբ իրականացվող «Կանայք քաղաքականության, հանրային կառավարման և քաղաքացիական հասարակության մեջ» ծրագրի շրջանակում։ Ծրագիրն իրականացվում է ՀՀ տարածքային կառավարման և ենթակառուցվածքների նախարարության և ՕքսԵՋեն հիմնադրամի հետ համագործակցությամբ։