Տեղի է ունենում «Էներգիտակ համայնքներ» տարեկան հանդիպումը

ԱՄՆ Միջազգային զարգացման գործակալության (ԱՄՆ ՄԶԳ) Հայաստանի էներգետիկ անվտանգության ծրագրի շրջանակում նոյեմբերի 12-14-ը Ծաղկաձորում տեղի է ունենում «Էներգիտակ համայնքներ» տարեկան հանդիպումը՝ եռօրյա աշխատաժողովի ձևաչափով: 

Այն իրականացվում է ՀՀ տարածքային կառավարման և ենթակառուցվածքների նախարարության հետ համատեղ, և նախատեսված է Հայաստանի մարզպետարանների և համայնքապետարանների ներկայացուցիչների համար: Էներգաարդյունավետության և վերականգնվող ռեսուրսների կիրառմամբ նախագծերի իրականացման միջոցով համայնքները կարող են կենսական դեր ունենալ տնտեսության զարգացման գործում` նպաստելով նաև էներգետիկ անվտանգության մակարդակի բարձրացմանը և ենթակառուցվածքների բարելավմանը: Էներգաարդյունավետության ծրագրերի իրականացման արդյունքում ձևավորված խնայողությունների միջոցով հնարավոր է բարձրացնել համայնքային ծառայությունների մատուցման որակը, կրճատել ջերմոցային գազերի արտանետումներն ու ստեղծել նոր աշխատատեղեր։ 

Այս գործում տեղական իշխանություններին աջակցելու նպատակով ԱՄՆ ՄԶԳ-ն 2023 թվականին մեկնարկեց «Էներգիտակ համայնքներ» ծրագիրը` վերականգնվող էներգետիկայի և էներգաարդյունավետության ծրագրերի նախագծման, մշակման, մոնիտորինգի և գնահատման համար անհրաժեշտ կարողությունները զարգացնելու և տեխնիկական աջակցություն տրամադրելու նպատակով։ 

ՀՀ համայնքներից և մարզպետարաններից 95 ներկայացուցիչ արդեն իսկ մասնակցել է կարողությունների զարգացման ու մաքուր էներգիայի նախագծերի իրագործման վերապատրաստումներին և առցանց դասընթացներին։

Համայնքներից և մարզպետարաններից ներկա շուրջ 90 մասնակիցներն աշխատարանների ընթացքում ձևավորել են 10 թիմեր, քննարկել համայնքային վերականգնվող էներգետիկայի և էներգաարդյունավետության բարձրացման արդի լուծումները, իրականացրել տվյալների վերլուծություններ, հաշվարկներ և հանդիպման ավարտին հանդես եկել իրենց թիմային նախագծային առաջարկներով։

Հայաստանի էներգետիկ անվտանգության ծրագրի կողմից համայնքներին տրամադրվող տեխնիկական աջակցության օրինակ է Գյումրի համայնքին օժանդակությունը, որը ներառում է մի քանի համայնքապատկան կառույցներում էներգաարդյունավետ վերանորոգման համար պետական սուբվենցիոն հայտերի նախապատրաստման և իրագործման աշխատանքներին աջակցությունը, ինչպես նաև համայնքի Կայուն էներգետիկ զարգացման և կլիմայի պահպանության գործողությունների ծրագրի (SECAP) մշակումն և ընդունումը: 

Նշված գործողությունների նպատակն է բարելավել բնակչության կյանքի որակը, թույլ տալ համայնքին խնայել միջոցներ և դրանք ուղղել համայնքային ծառայությունների և ենթակառուցվածքների զարգացմանը, որոնք կարևոր են կայուն զարգացման համար: 

Նմանօրինակ ծրագրերի բարեհաջող իրականացումը կարող է նախադեպային լինել նաև այլ համայնքների համար: ԱՄՆ ՄԶԳ-ն Հայաստանի էներգետիկայի բնագավառին աջակցելու երկարամյա պատմություն ունի, որը հիմնված է կառավարության հետ տասնյակ տարիների համագործակցության վրա՝ երկրի էներգամատակարարումը դիվերսիֆիկացնելու, ներկրվող հանածո վառելիքից կախվածությունը նվազեցնելու և ջերմոցային գազերի արտանետումները կրճատելու հանձնառությամբ: