Հայաստանն այսօր միացել է «Միջազգային արևային դաշինքի հիմնադրման մասին» շրջանակային համաձայնագրին

Հայաստանն այսօր միացել է «Միջազգային արևային դաշինքի հիմնադրման մասին» շրջանակային համաձայնագրին։ 

ՀՀ ՏԿԵ նախարար Գնել Սանոսյանն Արտաքին գործերի նախարարությունում ներկա է գտնվել ստորագրման արարողությանը։ 

Համաձայնագիրը ստորագրել է ՀՀ ԱԳ նախարարի տեղակալ Մնացական Սաֆարյանը և բնօրինակը պաշտոնապես հանձնել է համաձայնագրի ավանդապահ պետություն հանդիսացող Հնդկաստանի Հանրապետության արտակարգ և լիազոր դեսպան տիկին Նիլակշի Սահա Սինհային։ Արարողությանը ներկա էր նաև Հայաստանի Հանրապետությունում Ֆրանսիայի Հանրապետության արտակարգ և լիազոր դեսպան Օլիվիե Դըկոտինյին։ 

Ստորագրման արարողությունից հետո շնորհավորական ուղերձով հանդես է եկել ՏԿԵ նախարար Գնել Սանոսյանը։ «Գաղտնիք չէ, որ Հնդկաստանն աշխարհի առաջատարներից է արևային էներգետիկայի ոլորտում և արևային էներգետիկայի ոլորտում համագործակցության հաստատումը դրական և նոր զարգացումների հիմք կստեղծի։ 

Հայաստանի համար ևս վերականգնվող էներգետիկան համակարգի զարգացման կարևորագույն ուղղություններից է․ վերջին տարիներին հատկապես զարգանում է արևային էներգետիկան»,-ընդգծել է նախարարը՝ հավելելով, որ համաձայնագրին Հայաստանի միացումը համահունչ է Էներգետիկայի զարգացման ռազմավարությանը, որով նախատեսվում է 2030թ արևային էներգիայի մասնաբաժինը հասցնել ընդհանուրի մեջ 15 տոկոսի կամ 1000 ՄՎտ-ի, իսկ 2030-2040թթ՝ կառուցել ևս 500 ՄՎտ գումարային հզորությամբ արևային կայաններ։ 

Միջազգային արևային դաշինքը հիմնադրվել է Հնդկաստանի և Ֆրանսիայի համատեղ ջանքերի շնորհիվ՝ կլիմայի փոփոխության դեմ աշխատանքները մեկտեղելու և արևային էներգիայի ռեսուրսները լայնորեն կիրառելու նպատակով: Ներկայումս Դաշինքի շրջանակային համաձայնագիրը ստորագրել են 116 պետություն, որոնցից 94-ը ներկայացրել են վավերացման անհրաժեշտ փաստաթղթերը՝ դաշինքի լիիրավ անդամ դառնալու համար։ Դաշինքը, հանդիսանալով համաշխարհային հարթակ, սերտ համագործակցություն է ծավալում բազմակողմ զարգացման բանկերի (MDBs), զարգացման ֆինանսական հաստատությունների (DFIs), մասնավոր և պետական հատվածի կազմակերպությունների, քաղաքացիական հասարակության և այլ միջազգային կառույցների հետ: