ՀՀ ՏԿԵ նախարար Դավիթ Խուդաթյանի շնորհավորական ուղերձը` Ամանորի և Սուրբ Ծննդյան տոների առիթով

Սիրելի՛ հայրենակիցներ

Ամանորի և Սուրբ Ծննդյան նախաշեմին ցանկանում եմ ջերմորեն շնորհավորել ձեզ՝ մաղթելով խաղաղություն և առողջություն։ Անցնող տարին զերծ չէր մարտահրավերներից և խնդիրներից, բայց աշխատանքի ու ներդրած ջանքերի արդյունքում 2025-ում թողնում ենք կատարված մեծ աշխատանք: 2025 թվականին մենք հսկայական առաջընթաց ունեցանք «Հյուսիս-հարավ» ծրագրում: 

Աշտարակ-Գյումրի հատվածն ամբողջությամբ պատրաստ է երթևեկության համար, հարավային հատվածում առաջանցիկ տեմպերով ահռելի աշխատանք է տարվում, ըստ պլանավորվածի՝ ընթացքի մեջ են ճանապարհի տարբեր հատվածների նախագծման և շինարարական աշխատանքների մրցույթները։ ՀՀ կառավարության վարած քաղաքականության արդյունքում «Wizz Air» ավիաընկերությունը պաշտոնապես բազավորվեց «Զվարթնոց» օդանավակայանում, սկսեց դեպի Եվրոպա թռիչքներ իրականացնել Գյումրիի «Շիրակ» օդանավակայանից: 

Մեր քաղաքացիները հնարավորություն ստացան թռչել 8 նոր ուղղություններով դեպի Եվրոպա։ Սկսել է զգալի տեմպերով առաջ գնալ Միասնական երթուղային ցանցի ծրագիրը։ Հաջողվեց վերականգնվող էներգետիկայի ծավալների աննախադեպ աճի պայմաններում ապահովել ՀՀ էներգետիկ համակարգի կայունությունը, շարունակել էլեկտրաէներգիայի արտահանումը հարևան Իրան և Վրաստան։ Եվս 505 կմ երկարությամբ նորակառույց ճանապարհ 2025 թվականին հանձնվեց շահագործման, իսկ պետական համաֆինանսավորման ծրագիրը, որը համայնքների ենթակառուցվածքների զարգացմանն ուղղված Կառավարության կարևոր գործիքն է, համաֆինանսավորվեց աննախադեպ՝ 33.6 միլիարդ ՀՀ դրամով։ 

Անցնող տարվա կարևոր իրադարձություններից մեկը Վեդիի ջրամբարի շինարարական աշխատանքների ավարտն էր, ինչը ռազմավարական կարևորություն ունի Հանրապետության ջրային ռեսուրսների արդյունավետ կառավարման համար։ Այսպես կարելի է երկար թվարկել անցնող տարվա ձեռքբերումները: Տարածքային կառավարման և ենթակառուցվածքների ոլորտում մենք շարունակել ենք իրականացնել ծրագրեր, որոնք միտված են համայնքների համաչափ զարգացմանը, ճանապարհային, էներգետիկ, տրանսպորտային, ջրային ենթակառուցվածքների բարելավմանը, քաղաքացիների կյանքի որակի բարձրացմանը։ 

Հենց այս արդյունքն է մեզ ավելի մեծ ուժ և մոտիվացիա տալիս ավելի հավակնոտ պլաններ կազմել 2026 թվականի համար։ Մենք աշխատելու ենք նույն հանձնառությամբ՝ հանուն ուժեղ համայնքների, անվտանգ ու հուսալի ենթակառուցվածքների և մեր երկրի կայուն զարգացման։ Թող 2026 թվականը լինի խաղաղության ամրապնդման, առաջընթացի, նոր հնարավորությունների և ձեռքբերումների տարի։ Թող յուրաքանչյուր ընտանիքում տիրի ջերմություն, բարեկեցություն և վստահություն ապագայի նկատմամբ։ 

Շնորհավոր Ամանոր և Սուրբ Ծնունդ։