ՀՀ ՏԿԵ նախարարությունում կազմակերպվել է ուսումնական սեմինար-խորհրդակցություն

Համայնքներում 2026 թվականի մասնակցային բյուջետավորման փորձնական գործընթացի պատշաճ կազմակերպումն ապահովելու նպատակով ս/թ դեկտեմբերի 17-ին և 19-ին ՀՀ տարածքային կառավարման և ենթակառուցվածքների նախարարությունում կազմակերպվել է ուսումնական սեմինար-խորհրդակցություն, որի ընթացքում ՀՀ ՏԿԵՆ ֆինանսական, հաշվապահական հաշվառման և համայնքային բյուջեների վարչության համայնքային բյուջեների բաժնի պետ Լորիս Մուրադյանը 2026թ. գործընթացին մասնակից թվով 52 համայնքների ներկայացուցիչներին ներկայացրել է մասնակցային բյուջետավորման գործընթացի մեկնարկի համար անհրաժեշտ իրավական հիմքերը, ընթացակարգերը, գործընթացի տարբեր փուլերում բնակչության ներգրավման, համագործակցության, նրանց կողմից առաջ քաշվող խնդիրների, ծրագրերի և առաջարկությունների իրականացման հնարավոր ուղիները, գործընթացի իրականացման հնարավոր խոչընդոտները, նախատեսված պետական ֆինանսավորման բաշխման մեխանիզմները, ինչպես նաև անհրաժեշտ փաստաթղթերի ձևանմուշները: 

Անդրադարձ է կատարվել նաև ՀՀ կառավարության 02.11.2023թ. N1890-Ն որոշմամբ հաստատված մասնակցային բյուջետավորմամբ ձևավորված ծրագրերի իրականացման նպատակով պետական բյուջեից համայնքներին սուբվենցիաների տրամադրման կարգում նախատեսվող փոփոխություններին: Գործընթացի իրականցումն ապահովելու վերաբերյալ տեղի է ունեցել բովանդակային քննարկումներ և խորհրդատվություններ։ 

Քննարկվել է նաև համայնքային կառավարման տեղեկատվական համակարգերի հետ բնակչության և իրավաբանական անձանց պետական ռեգիստրի, ինչպես նաև հեռախոսահամարներին կարճ հաղորդագրությունների (SMS) առաքման համակարգերի ինտեգրվածությանն առնչվող խնդիրները: 

Մասնակցային բյուջետավորման ներդրումը թույլ կտա խթանել բնակիչների անմիջական մասնակցությունը համայնքային որոշումների կայացմանը, համայնքային բյուջեի պլանավորմանն ու կառավարմանը, բարձրացնել տեղական ինքնակառավարման մարմինների նկատմամբ վստահությունն ու բնակիչների քաղաքացիական պատասխանատվությունը: Միևնույն ժամանակ համայնքապետարանները կապահովվեն համապատասխան գործիքակազմով և գիտելիքով՝ խթանելու քաղաքացիների մասնակցայնությունը: