ԳՄՀԸ ԷԿՈսերվ ծրագրի գործընկերները և ՀՀ նախարարությունների ներկայացուցիչները կազմակերպել են դաշտային այցելություն Գեղարքունիքի մարզ

Հուլիսի 25-ին, Գերմանիայի Դաշնային Հանրապետության տնտեսական համագործակցության և զարգացման նախարարության
(BMZ) պատվիրակմամբ Գերմանիայի միջազգային համագործակցության ընկերության (ԳՄՀԸ/GIZ) ԷԿՈսերվ բնապահպանական ծրագրի շրջանակներում գործընկեր նախարարությունների ներկայացուցիչների հետ համատեղ կազմակերպվել է մի շարք գործողությունների արդյունքների ուսումնասիրությանն ուղղված դաշտային այցելություն Գեղարքունիքի մարզ:

Այցելությանը մասնակցել են ՀՀ տարածքային կառավարման և ենթակառուցվածքների նախարարության Տեղական ինքնակառավարման քաղաքականության վարչության պետ Ա. Գիլոյանը, ՀՀ էկոնոմիկայի նախարարության Գյուղատնտեսական ծրագրերի մշակման, ռեսուրսների օգտագործման և կոոպերացիայի զարգացման վարչության պետ Ի. Փանոսյանը, նույն վարչությունից Հ. Դավեյանը, ՀՀ շրջակա միջավայրի նախարարության Ռազմավարական քաղաքականության վարչությունից Ա. Ղավալյանը:

Ուսումնասիրվել են «Անասնակերի արտադրություն և արոտների բարելավում որպես ՔՈՎԻԴ-19 հետևանքների մեղմման միջոցառում» գործողության շրջանակներում 10 տարի և ավել չօգտագործվող վարելահողերի մշակության փորձադաշտերի արդյունքները Մարտունի համայնքի Արծվանիստ և Գավառ համայնքի Գանձակ բնակավայրերում: Վարելահողերը մշակվել են անասնակերի արտադրության նպատակով՝ կորնգանի ցանքի նոր տեխնոլոգիայի ներդրմամբ՝ նաև նպատակ ունենալով նվազեցնել բնական էկոհամակարգերի վրա առկա ճնշումները: Ծրագրի շրջանակներում ՀՀ Գեղարքունիքի, Լոռու, Շիրակի մարզերում մշակվել են շուրջ 300.42 հա վարելահողեր, որոնք պատկանում են 326 ֆերմերների:

«Գետերի ափամերձ տարածքների վերականգնում Հայաստանում» ՔՈՎԻԴ-19-ի արձագանքման ծրագրի շրջանակներում
Արծվանիստ գետի շրջակայքում ուսումնասիրվել են ուռենիների կտրոնների տնկատարածքները: Ընդհանուր առմամբ Գեղարքունիքի մարզում՝ 6 գետերի ափամերձ տարածքներում, տնկվել են ավելի քան 1մլն ուռենու կտրոններ:

Գործընկեր նախարարությունների ներկայացուցիչները կատարել են դիտարկումներ և կարևորել ծրագրի գործողությունները,
ինչպես տնտեսական, այնպես էլ բնապահպանական առումով, քանի որ այդ գործողությունների արդյունքները մարզի՝ հատկապես Սևանա լճի էկոհամակարգի համար ստեղծում են բարենպաստ միջավայր: Բնական էկոհամակարգերի վրա ճնշման նվազեցումը և բարելավման աշխատանքները հետագայում կունենան նաև զգալի դրական ազդեցություն կլիմայի փոփոխության բացասական
հետևանքների մեղմման համար: