«Կանանց ներգրավվածությունը հանրային-մասնավոր գործընկերության ամրապնդման գործում»․ Տեղի է ունեցել Կանանց հզորացման ակումբի չորրորդ միջոցառումը

Կանանց հզորացման ակումբի՝ WE Club-ի «Կանանց ներգրավվածությունը հանրային-մասնավոր գործընկերության ամրապնդման գործում» խորագրով չորրորդ միջոցառումը տեղի ունեցավ Վանաձորում 2024թ. հունիսի 17-ին: 

Ակումբի նպատակն էր նպաստել հանրային, մասնավոր և քաղհասարակության միջև երկխոսությանը, փորձել վերհանել համագործակցության խոչընդոտները, քննարկել առկա և իրականացվելիք հանրային-մասնավոր համաֆինանսավորմամբ տեղական տնտեսական զարգացման ծրագրերը, ի աջակցություն հանրային հատվածի նախաձեռնությունների մասնավոր հատվածի տեխնոլոգիական նորարարությունների կիրառումը, սոցիալական ձեռնարկատիրության դերը համայնքային զարգացման համատեքստում և այլ արդիական թեմաներ: 

Ակումբի սույն միջոցառումը հատկանշական էր նրանով, որ մասնակիցների կազմում էին նաև ֆինանսական և տեխնիկական համագործակցության հայ-գերմանական միջկառավարական խորհրդակցությունների նպատակով Հայաստանում գտնվող Գերմանիայի տնտեսական համագործակցության և զարգացման դաշնային նախարարության պատվիրակության անդամները, Շվեյցարիայի զարգացման և համագործակցության զարգացման գործակալության (SDC) տարածաշրջային փոխտնօրեն և առաքելության ղեկավարի տեղակալ Ուրսուլա Լոյբլին, Գերմանական միջազգային համագործակցության ընկերության (GIZ) հայաստանյան գրասենյակի ղեկավար Մադլեն Ռաուշենբերգերը, Վերականգնման վարկերի բանկի և GIZ ներկայացուցիչները: Միջոցառմանը բացման խոսքով հանդես եկան Գերմանիայի տնտեսական համագործակցության և զարգացման դաշնային նախարարության Հարավարևելյան և Արևելյան Եվրոպայի, Հարավային Կովկասի քաղաքականության ավագ մասնագետ, պատվիրակության ղեկավար տիկին Անժելիկա Զյուլցնը, GIZ-ի կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի խորհրդատու Լիկա Մկրտչյանը և փորձագետ Մարգարիտա Հակոբջանյանը: Ակումբի բանախոսներն էին «ՀԿ Կենտրոն» հասարակական կազմակերպության նախագահ Արփինե Հակոբյանը, «Հայաստանի մանուկներ» բարեգործական հիմնադրամի «Կոնցեպտ» հյուրանոցի ղեկավար Սեդա Մխիթարյանը, Վանաձորի համայնքի ղեկավարի խորհրդական Արման Բերնեցյանը, Գրանդ Լոռի ՍՊԸ բիզնես խորհրդատու Քրիստ Մարուքյանը և Լոռու զբոսաշրջության կառավարման գրասենյակի ղեկավար Քրիստինե Հովսեփյանը: Բանախոսների քննարկումը վարում էր Շանթ հ/ը հաղորդավար Քրիստինե Ալագուլյանը: 

Հաջողության բանաձև խորագրում հանդես եկավ Վանաձորի տեխնոլոգիական կենտրոնի ներկայացուցիչ Աննա Հովհաննիսյանը, ով ներկայացրեց իր կամավորական աշխատանքի արդյունքները ինչպես Լոռու մարզի աղետի գոտում տուժածներին աջակցություն ցուցաբերելու հարցում, այնպես էլ աջակցության կարիք ունեցող այլ ընտանիքներին և անհատներին օժանդակելու պատմությունները: Աշխատանքային խմբերում ներկաները քննարկեցին մարզպետարանի, համայնքապետարանների, մասնավոր և քաղհասարակության կառույցների, ակտիվ անհատների և նախաձեռնող խմբերի կողմից իրականացված ծրագրերն ու համագործակցության հնարավորությունները, ներկայացրեցին մարտահրավերները, դրանց հնարավոր լուծումներն ու գործնական առաջարկներ: GIZ-ի կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի շրջանակներում ստեղված WE CLUB-ը (Women Empowerment Club) մի հարթակ է, որը նպաստում է կանանց դերակատարության բարձրացման ՏԻՄ-երում, հնարավորություն է ընձեռում քաղաքացիներին ակտիվորեն մասնակցել որոշումների կայացմանը, բարելավել նրանց կարողություններն ու հմտությունները որոշումների կայացման գործընթացներին ակտիվ ներգրավվելու համար, համայնքների հանրային, քաղաքական և սոցիալական ոլորտներում ապահովել կանանց և տղամարդկանց հավասար մասնակցություն: 

«Լավ կառավարում հանուն տեղական զարգացման Հարավային Կովկասում» ծրագիրն իրականացվում է Գերմանիայի տնտեսական համագործակցության և զարգացման դաշնային նախարարության և Շվեյցարիայի զարգացման և համագործակցության գործակալության (ՇԶՀԳ) ցուցաբերած աջակցության շնորհիվ: 

Ծրագիրն իրականացվում է Տարածքային կառավարման և ենթակառուցվածքների նախարարության հետ համատեղ: