Տեղի է ունեցել «Համայնքների ավագանիների անդամների կարողությունների զարգացում» ծրագրի փակման արարողությունը․ 877 ավագանի վերապատրաստվել է

Տեղի է ունեցել «Համայնքների ավագանիների անդամների կարողությունների զարգացում» ծրագրի փակման արարաողությունը։ Ծրագրի շրջանակներում 1377 ավագանիներից վերապատրաստվել է 877-ը։ 

Համայնքների ավագանիների անդամների կարողությունների զարգացում» ծրագրով վերապատրաստումներն իրականացվեց Պետական կառավարման ակադեմիայի դասախոսների և փորձագետների կողմից ՀՀ Տարածքային կառավարման և ենթակառուցվածքների նախարարության, Հայաստանի Հանրապետության պետական կառավարման ակադեմիայի Գերմանական միջազգային համագործակցության ընկերության (ԳՄՀԸ/GIZ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի շրջանակում՝ Գերմանիայի տնտեսական համագործակցության և զարգացման դաշնային նախարարության և Շվեյցարիայի զարգացման և համագործակցության գործակալության աջակցությամբ: 

ՀՀ ՏԿԵՆ ՏԻՔ վարչության պետ Աշոտ Գիլոյանը ՀՀ տարածքային կառավարման և ենթակառուցվածքների նախարարության անունից շնորհակալություն հայտնեց ծրագիրն իրականացնողներին ու հիշեցրեց, որ ավագանու անդամները ծառայություններ են մատուցում հանրությանը և որոշումներ են կայացնում համայնքի համար։ «Այդ դասընթացները նրա համար են, որ զարգացնեք ձեր կարողությունները, ուժեղ լինեք և որակյալ ծառայություններ մատուցեք հասարակությանը»,- ասաց նախարարության տեղական ինքնակառավարման քաղաքականության վարչության պետը։

ՀՀ պետական կառավարման ակադեմիայի ռեկտոր Խաչատուր Ղազեյանի խոսքով «Համայնքների ավագանիների անդամների կարողությունների զարգացում» ծրագիրն աննախադեպ էր, որն իրականացնելու համար ընտրվել էին ոլորտի լավագույն մասնագետները, և այն հանգամանքը, որ ավագանիների անդամների մոտ 65 տոկոսը մասնակցել է դասընթացներին, արդեն իսկ հաջողություն է։ 

Հայաստանում Շվեյցարիայի փոխդեսպան, Հարավային Կովկասում Շվեյցարական համագործակցության գրասենյակի տարածաշրջանային տնօրենի տեղակալ Ուրսուլա Լաուբլին շնորհակալություն հայտնեց այս հաջողված դասընթացին մասնակցած բոլոր կողմերին և խոստովանեց, որ շատ տպավորված է Հայաստանում իրականացվող համայնքների խոշորացման գործընթացից․ այս առումով Շվեյցարիան սովորելու բան ունի Հայաստանից։ Նա խորհուրդ տվեց ավագանու անդամներին լիարժեք պատկերացնել իրենց լիազորություններն ու առաջնային դերը համայնքներում։

Հայաստանում Գերմանական միջազգային համագործակցության ընկերության (GIZ) հայաստանյան գրասենյակի ղեկավար Մադլեն Ռաուշենբերգերի խոսքով էլ, ծրագիրը վկայություն է միջազգային համագործակցության մասին։ Իսկ ծրագրի հաջողությունը պայմանավորված է ինչպես դասընթացների կազմակերպիչների, այնպես էլ համայնքների ներկայացուցիչների աշխատանքով։

Միջոցառման երկրորդ մասում կարճ ելույթներով հանսեդ են եկել վերապատրաստված ավագանիներ և ստացել վերապատրաստման վկայականները։