Երկօրյա վերպատրաստման առցանց դասընթացներ՝ Հայաստանի համայնքների մամուլի խոսնակների և հանրային կապերի պատասխանատուների համար

Գերմանական միջազգային համագործակցության ընկերության (GIZ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի շրջանակներում իրականացվեցին հաղորդակցության ոլորտում վերպատրաստման առցանց դասընթացներ Հայաստանի համայնքների մամուլի խոսնակների և հանրային կապերի պատասխանատուների համար հունիսի 12-ին և 19-ին: 

Հանդիպումների ընթացքում մասնակիցներին ներկայացվեցին ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի և ՀՀ տարածքային կառավարման և ենթակառուցվածենրի նախարարության կողմից Ալավերդիում համակարգվող Հայկական միասնական տեղեկատվական կենտրոնի՝ Լոռիում և Տավուշում տեղի ունեցած աղետի լուսաբանման աշխատանքներն ու մարտահրավերները, կամավորների աշխատանքի լուսաբանման նրբությունները, համայնքների ճանաչելիության բարձրացմանն ու արցախահայերի ինտեգրմանն առնչվող հարցերը: 

Դասընթացները վարում էին ՀՀ ՏԿԵՆ մամուլի խոսնակ Սոնա Հարությունյանը, հանրային կապերի մասնագետ Ծովինար Խաչատրյան և GIZ-ի կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի խորհրդատու Լիկա Մկրտչյանը: Հանդիպումներին մասնակցեցին մոտ 40 միավորված համայնքի ներկայացուցիչներ: Հաղորդակցության ոլորտում Հայաստանի համայնքների մամուլի խոսնակների և հանրային կապերի պատասխանատուների վերապատրաստման դասընթացները կրում են պարբերական բնույթ և ներառում են հաղորդակցությանն առնչվող բազմազան թեմաների շուրջ կարողությունների զարգացում: 

2020 թ-ից ի վեր վերապատրաստում են անցել Հայաստանի բոլոր միավորված համայնքների հաղորդակցության ոլորտի մասնագետները, ում կարողությունների զարգացումն ու գիտելիքների թարմացումը նպաստում է համայնքային կայքերի և սոցիալական մեդիայի միջոցով հաղորդակցության, տեղեկատվության որակի, իրազեկվածության, մեդիա գրագիտության և քաղաքացիների ներգրավվածության բարձրացմանը: 

Դասընթացի ավարտին իրականացվեց մասնագետների կարիքների գնահատման հարցում հետագա վերապատրաստումներն ավելի թիրախային դարձնելու նպատակով: 

«Լավ կառավարում հանուն տեղական զարգացման Հարավային Կովկասում» ծրագիրն իրականացվում է Գերմանական միջազգային համագործակցության ընկերության (GIZ) կողմից՝ Գերմանիայի տնտեսական համագործակցության և զարգացման դաշնային նախարարության աջակցությամբ և Հայաստանում՝ Շվեյցարիայի զարգացման և համագործակցության գործակալության (SDC) համաֆինանսավորմամբ: Ծրագիրն իրականացվում է ՏԿԵՆ հետ համատեղ: