Համայնքային ծառայողների վերապատրաստման դասընթացները շարունակվում են

Շարունակվում են ՀՀ տարածքային կառավարման նախարարության և ՀՀ պետական կառավարման ակադեմիայի կողմից կազմակերպվող՝ համայնքային ծառայողների վերապատրաստման դասընթացները։ 2025 թվականի հունիսի 11-ի դրությամբ վերապատրաստվել է 124 համայնքային ծառայող: 

Հունիսի 11-ին ավարտվել են ՀՀ Լոռու մարզի Ստեփանավանի և ՀՀ Գեղարքունիքի մարզի Վարդենիսի համայնքապետարանների աշխատակազմերի 50 համայնքային ծառայողների վերապատրաստման դասընթացները։ Դասընթացներն անցկացվել են ինտերակտիվ աշխատանքի մեթոդներով։ Նյութի արդյունավետ ընկալումն ապահովելու նպատակով տեղի են ունեցել կարճ քննարկումներ, համադրվել են մասնակիցների կարծիքները։ 

Տեղական ինքնակառավարման մարմինների վերապատրաստման շրջանակներում սույն թվականի հունիսի 4-ից 6-ը վերապատրաստման դասընթաց է անցկացվել Մարտունի համայնքում, որին մասնակցել է ՀՀ Գեղարքունիքի մարզի տեղական ինքնակառավարման մարմինների 18 ներկայացուցիչ։ Հունիսի 10-ից մեկնարկել է ՀՀ Արմավիրի և Կոտայքի մարզերի տեղական ինքնակառավարման մարմինների ներկայացուցիչների վերապատրաստման գործընթացը։ 

Հունիսի 16-ից վերապատրաստման գործընթացում կընդգրկվեն ՀՀ Արագածոտնի և ՀՀ Սյունիքի մարզերի տեղական ինքնակառավարման մարմինների ներկայացուցիչները և համայնքային ծառայողները։ 

Համայնքային ծառայողների ակտիվ մասնակցությունն ու բարձր ներգրավվածությունը վկայում են վերապատրաստման ծրագրի կարևորության և արդյունավետության մասին։ Դասընթացները նպատակաուղղված են տեղական ինքնակառավարման մարմինների ինստիտուցիոնալ կարողությունների և մասնագիտական հմտությունների շարունակական զարգացմանը, ինչը կայուն և արդյունավետ համայնքներ ունենալու գրավականն է: