ՀՀ ՏԿԵ նախարարի տեղակալ Արմեն Սիմոնյանը ընդունել է Լիտվայի Հանրապետության տրանսպորտի և հաղորդակցության նախարարի տեղակալ Յուլիուս Սկաչկաուսկասի գլխավորած պատվիրակությանը

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը մայիսի 20-ին ընդունել է Լիտվայի Հանրապետության տրանսպորտի և հաղորդակցության նախարարի տեղակալ Յուլիուս Սկաչկաուսկասի գլխավորած պատվիրակությանը, որի կազմում էին նաև ԼՀ նախագահի տնտեսական և սոցիալական քաղաքականության հարցերով խորհրդական Վայդաս Օգուստինավիչիուսը և ՀՀ-ում Լիտվայի Հանրապետության դեսպանատան երկրորդ քարտուղար Էվալդաս Գալվանաուսկասը։ Արմեն Սիմոնյանը ողջունել է հյուրերին, կարևորել տրանսպորտի ոլորտում Հայաստանի և Լիտվայի Հանրապետությունների միջև եղած խորը համագործակցային կապերը և շնորհակալություն է հայտնել ոլորտում ցուցաբերած մեծ աջակցության համար։ Խոսելով հունիս ամսին լիտվացի փորձագետների՝ Հայաստան ժամանման մասին՝ Սիմոնյանը նշել է․ «Վերջին տարիներին երկու երկրների փորձագետների միջև փորձի և գիտելիքների փոխանակումը խթան է հանդիսացել օդային, երկաթուղային և ավտոմոբիլային տրանսպորտային ոլորտների առաջխաղացման համար»: Յուլիուս Սկաչկաուսկասը, անդրադառնալով Լիտվա-Հայաստան և հակառակ ուղղություններով չվերթերին, առաջարկել է քայլեր ձեռնարկել չվերթների ավելացման համար, որին ի պատասխան՝ Սիմոնյանը շեշտել է, որ հարցը վերաբերում է բիզնես ոլորտին, և շահառուների պահանջարկից է ձևավորվում առաջարկ, ուստի հաշվի առնելով եղանակային տաքացումները՝ չվերթերի թիվը կունենա բնականոն աճ։ Հանդիպման ընթացքում քննարկվել են նաև հյուսիս-հարավ ճանապարհին, Հայաստանի տարածքով Հնդկաստանից դեպի Եվրոպա և հակառակը իրականացվող բեռնափոխադրումներին, ինչպես նաև Հարավային Կովկասում ճանապարհների ապաշրջափակմանը վերաբերող հարցեր։