Քննարկվել է ՏԿԵՆ-ում բարեփոխումների իրականացումը, ներդրումային ծրագրերի փաստաթղթերի մշակումը

ՀՀ Տարածքային կառավարման և ենթակառուցվածքների նախարարի տեղակալ Վաչե Տերտերյանը հանդիպել է Զարգացման Ֆրանսիական գործակալության և Ասիական զարգացման բանկի ներկայացուցիչների հետ: Հանդիպման նպատակն էր քննարկել ՀՀ տարածքային կառավարման և ենթակառուցվածքների նախարարությանը հանրային ներդրումային ծրագրերի շրջանակներում տեխնիկական աջակցության տրամադրման գործընթացը, ՏԿԵՆ-ում բարեփոխումների իրականացումը, ներդրումային ծրագրերի փաստաթղթերի մշակումը, որպեսզի դրանք համապատասխանեն Հայաստանի նոր հանրային ներդրումների կառավարման համակարգի ռազմավարական, տնտեսական, ֆինանսական և տեխնիկական պահանջներին։ Վաչե Տերտերյանը, ողջունելով հյուրերին, ընդգծել է հանրային ներդրումների կառավարման շրջանակի ուղղությամբ տեխնիկական և նոր մեթոդական աջակցության տրամադրման կարևորությունը։ Զարգացման ֆրանսիական գործակալության Կովկասի տարածաշրջանային գրասենյակի ղեկավարի տեղակալ Բերենժեր Կալամանը նշել է, որ ճյուղային նախարարությունները կիրառում են իրենց մեթոդաբանությունները, բայց հաճախ շատ տեխնիկական։ Հետևաբար կառավարման նոր շրջանակը նպատակ ունի հաշվի առնել զեկույցի հիմնական առաջարկությունները, մասնավորապես միջոլորտային և ոլորտային ռազմավարական փաստաթղթերի կառուցվածքի բարելավումը, պլանավորման համահունչ տեսլականների սահմանումը, ծրագրերի վերաբերյալ հավաքագրվող տեղեկատվության հետևողականության ապահովումը, միջոցների փաթեթի հետ կապված սահմանափակումների հաշվի առնելը, և գնահատման միասնական մեթոդաբանության մշակումը` ապահովելու բոլոր խոշոր ծրագրերի համադրելիությունը` անկախ ֆինանսավորման աղբյուրներից կամ իրականացնողներից: Ասիական զարգացման բանկի ֆինանսական հատվածի գլխավոր տնտեսագետ Ժոաո Ֆարինյա Ֆերնանդեսը նշել է, որ տեխնիկական աջակցությունը կլինի երկու փուլով և նախատեսվող բարեփոխումները հնարավորություն կտան սահմանել ճյուղային նախարարությունների ներդրումային ծրագրերի գնահատման միասնական գործընթաց՝ լավագույն փորձին համապատասխան: Ֆերնանդեսը շեշտել է, որ առաջիկայում տեղի կունենան հանդիպում-քննարկումներ ՀՀ ՏԿԵ, էկոնոմիկայի և ֆինանսների նախարարությունների ներկայացուցիչների մասնակցությամբ: Ըստ Տերտերյանի, քանի որ ՀՀ տարածքային կառավարման և ենթակառուցվածքների նախարարությունը կենտրոնացնում է երկրի ենթակառուցվածքային ծրագրերի մեծ մասը, կարևոր է ստանալ տեխնիկական և մեթոդական աջակցություն՝ նախարարության ծրագրերի առաջնահերթությունների որոշման համար՝ հիմնված դրանց մանրակրկիտ և փաստագրված վերլուծության վրա: Հանդիպման ժամանակ քննարկվել են տրամադրվելիք աջակցության, ինչպես նաև կարևոր նշանակություն ունեցող այլ հարցեր: