ՀՀ ՏԿԵ նախարարությունում տեղի է ունեցել խորհրդակցություն փոխնախարարներ Քրիստինե Ղալեչյանի և Նարեկ Մանուկյանի գլխավորությամբ

ՀՀ տարածքային կառավարման և ենթակառուցվածքների նախարարությունում տեղի է ունեցել խորհրդակցություն փոխնախարարներ Քրիստինե Ղալեչյանի և Նարեկ Մանուկյանի գլխավորությամբ։ 

Քննարկմանը մասնակցել են նաև «Ճանապարհային դեպարտամենտ» հիմնադրամի գործադիր տնօրեն Արմեն Զոհրաբյանը, ինչպես նաև ՀՀ ՏԿԵ նախարարության, հիմնադրամի և Լոռու և Տավուշի մարզպետարանների ներկայացուցիչներ։ 

Քննարկման ընթացքում անդրադարձ է կատարվել 2024թ. մայիսին Լոռու և Տավուշի մարզերում տեղի ունեցած հեղեղումների հետևանքների վերացմանն ուղղված միջոցառումներին։ Քննարկվել են վնասված և փլուզված ճանապարհահատվածների, կամուրջների վերականգնման աշխատանքների իրականացման ընթացքը, ծագած խնդիրները։ 

Փոխնախարար Ղալեչյանը հանձնարարականներ է տվել Այրումի ժամանակավոր կամրջի տեղադրման և Ախթալայի նոր կամրջի տեղադրման աշխատանքների կազմակերպման և մի շարք այլ հարցերի վերաբերյալ՝ ընդգծելով աշխատանքների արագ և որակով իրականացման կարևորությունը։ 

Փոխնախարար Մանուկյանն իր հերթին ընդգծել է, որ սուբվենցիոն և հրատապ ծրագրերով համայնքներում նախատեսվում է իրականացնել վնասված համայնքային ճանապարհների, Ալավերդի համայնքի բազնաբնակարան շենքերի տանիքների, բակային տարածքների, ջրատար համակարգերի և մի շարք այլ վերականգնղական աշխատանքներ։ 

Փոխնախարարները շեշտել են պատասխանատուների կողմից աղետի հետևանքների վերացման աշխատանքներին առաջնահերթություն և պատշաճ ուշադրություն դարձնելու կարևորությունը՝ ազդակիր հակայնքների և բնակիչների անվտանգությունն ու բնականոն գործունեությունն ապահովելու նպատակով։ 

ՏԿԵ նախարարությունը շարունակելու է համագործակցել շահագրգիռ կառույցների հետ՝ ապահովելու Լոռու և Տավուշի մարզերում հեղեղումների հետևանքների վերացման աշխատանքների իրականացումը և բնական աղետների նկատմամբ դիմակայունության բարձրացումը։