ՀՀ ՏԿԵ նախարար Դավիթ Խուդաթյանն այցելել է Վայոց ձորի մարզ

ՀՀ ՏԿԵ նախարար Դավիթ Խուդաթյանն այսօր այցելել է Վայոց ձորի մարզ։ 

ՏԿԵ փոխնախարար Նարեկ Մանուկյանի, մարզպետ Կոլյա Միքաելյանի, մարզի համայնքների ղեկավարների հետ այցելել են շինհրապարակներ՝ ծանոթանալու իրականացված աշխատանքներին։

Արենի համայնքում նախարարն ու մյուս պաշտոնյաներն այցելել են Ելփին բնակավայրի նորակառույց մանկապարտեզի շինհրապարակ։ Ելփինը երբեք մանկապարտեզ չի ունեցել, բայց հիմա սուբվենցիոն ծրագրով, ավելի քան 334 մլն դրամով, կառուցվում է 60 երեխայի համար նախատեսված ժամանակակից չափանիշներով նոր մանկապարտեզ։ 2024 թվականի սուբվենցիոն ծրագրով Ելփին բնակավայրում 45 մլն դրամով կառուցվում է նաև փողոցների արտաքին լուսավորության ցանց։ Արդեն իսկ տեղադրված է 300 լուսատու։ Արդյունքում կլուսավորվի 13.1 կմ փողոց։ 

Հաջորդիվ այցելել են Չիվա բնակավայր, որտեղ գիշերային լուսավորության նոր ցանց է կառուցվել։ 

Մյուս կանգառը Արենին էր, որտեղ Խուդաթյանը ծանոթացել է դեպի մանկապարտեզ և դեպի եկեղեցի տանող ճանապարհների կառուցման ավարտական փուլի աշխատանքներին։ 

Նախարարն այցելել է նաև սահմանամերձ բնակավայրերում պետբյուջեից տրամադրվող 16 մլն դրամով կառուցվող տներ, ծանոթացել շինարարական աշխատանքների ընթացքին, զրուցել բնակիչների հետ։ Միայն Արենի բնակավայրում այս ծրագրով կառուցվող տների թիվը 100֊ից ավել է։ 

Արենի համայնքում վերջին կանգառը Արփի բնակավայրն էր, որտեղ սուբվենցիոն ծրագրով ասֆալտապատվել է 1-ին փողոցի 700 մետր հատվածը։ Նախարարն այցելել է նաև Եղեգնաձոր և Վայք համայնքներ, ծանոթացել սուբվենցիոն ծրագրով իրականացված ասֆալտապատման աշխատանքներին։ 

Խուդաթյանը հանձնարարել է թերություններով կատարված աշխատանքները չընդունել, շինարարներին չվճարել՝ մինչև թերությունների շտկումը, քննարկվել են ասֆալտի նմուշառման և լաբորատոր փորձաքննության պատշաճ անցկացման հետ կապված հարցեր։