ՀՀ ՏԿԵ նախարար Գնել Սանոսյանը մասնակցել է ԵՊՀ աշխարհագրության և երկրաբանության ֆակուլտետի հոբելյանական «90-ամյա գերազանցություն» խորագրով միջոցառմանը

ՀՀ տարածքային կառավարման և ենթակառուցվածքների նախարար Գնել Սանոսյանն այսօր մասնակցել է ԵՊՀ աշխարհագրության և երկրաբանության ֆակուլտետի հոբելյանական «90-ամյա գերազանցություն» խորագրով միջոցառմանը։ 

ԵՊՀ-ում նախարարը նախ մասնակցել է անվանի երկրաբան Պետրոս Ալոյանի անվան ԳԵՈ-Ինովացիոն կրթական կենտրոնի բացմանը, ապա ներկա է գտնվել հանդիսավոր միջոցառմանը։ 

Նախարարը ողջունել է ԵՊՀ-ի պրոֆեսորադասախոսական անձնակազմին, շնորհավորել աշխարհագրության և երկրաբանության ֆակուլտետի դասախոսներին, շրջանավարտներին, ուսանողներին։ Նախարարն ընդգծել է, որ աշխարհագրության և երկրաբանության ոլորտը չափազանց կարևոր է և թե հենց այս ֆակուլտետում ստացած կրթությունը որքան է օգնում իրեն ամենօրյա աշխատանքում՝ Տարածքային կառավարման և ենթակառուցվածքների նախարարի պաշտոնում․«Իմ կրթությունը, ստացած փորձն ու գիտելիքներն ինձ չափազանց շատ են օգնում այսօր իմ աշխատանքում, պետական կառավարման համակարգում։ Հայաստանի համայնքների, բնակավայրերի, դրանց տեղի, դիրքի, բնակչության, զարգացման հնարավորությունների, պոտենցիալի, ենթակառուցվածքների մասին բավարար գիտելիք եմ ստացել և դա ամեն օր կիրառում եմ իմ աշխատանքում»,-ասել է նախարարը՝ հավելելով, որ ներկայում, իր ստացած գիտելիքները, համեմելով պետական համակարգի փորձի հետ, Հայաստանի աշխարհագրություն է դասավանդում հարազատ ֆակուլտետում։ 

 Լինելով ԵՊՀ աշխարհագրության և երկրաբանության ֆակուլտետի շրջանավարտ, նախարար Սանոսյանն այսօր արժանացել է մեդալի։