ՀՀ ՏԿԵ նախարարի տեղակալ Վաչե Տերտերյանն ընդունել է Զարգացման ֆրանսիական գործակալության ներկայացուցիչներին

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն ընդունել է Զարգացման ֆրանսիական գործակալության ներկայացուցիչներին՝ Հարավկովկասյան գրասենյակի ղեկավարի տեղակալ Օլգա Կուկուին, Քաղաքային զարգացման թիմի ղեկավար Կարին Ֆղուին, ՀՀ-ում ԶՖԳ ծրագրի ղեկավար Լիզ Էնեզյանին։ 

Ներկայացնելով իրենց փորձը Արևելյան գործընկերության անդամ մյուս երկրների հետ համագործակցության մասով, ԶՖԳ ներկայացուցիչները հետաքրքրվել են, մասնավորապես, Հայաստանի քաղաքների զարգացման, դպրոցների սեյսմոկայունության բարձրացման, կոշտ թափոնների կառավարման ազգային ռազմավարության մշակման ծրագրերում մասնակցություն ունենալու հնարավորության ու ներգրավվածության մասին։ 

ՏԿԵ փոխնախարար Վաչե Տերտերյանը ներկայացրել է Կառավարության առաջնահերթությունները։ Նախարարի տեղեկալը նշել է, որ Գյումրին դարձել է զբոսաշրջության համար գրավիչ քաղաք և նույն օրինակով կարել է զարգացնել նաև մյուս խոշոր քաղաքները, մասնավորապես՝ խոսվել է Վանաձորի զարգացման ծրագրի մասին։ Այս համատեքստում Տերտերյանը առաջնահերթ է համարել նաև աղբահանության ու «խելացի քաղաքների» շրջանակներում համագործակցության հնարավորությունը։ 

Հանդիպման ավարտին պայմանավորվածություն է ձեռք բերվել աշխատանքային կարգով նախանշել առաջնահերթ ուղղությունները, դրանք սահմանված կարգով քննարկել գործընկեր գերատեսչությունների հետ և առաջիկա հանդիպումներին արդեն առավել առարկայական աշխատել կոնկրետ ծրագրերի շուրջ։