Տեղի է ունեցել «Մասնակցային բյուջետավորումը տեղական մակարդակում» խորագրով համաժողովը

ՀՀ տարածքային կառավարման և ենթակառուցվածքների և ՀՀ ֆինանսների նախարարությունների համատեղ ջանքերով տեղի է ունեցել «Մասնակցային բյուջետավորումը տեղական մակարդակում» խորագրով համաժողովը: 

Այն մեկտեղել էր Հայաստանից և արտերկրից շուրջ 150 մասնակիցների, այդ թվում՝ քաղաքականություն մշակողների, մարզպետարանների, համայնքապետարանների, քաղաքացիական հասարակության ներկայացուցիչների, փորձագետների և քաղաքացիների՝ քննարկելու մասնակցային բյուջետավորման դերը տեղական ժողովրդավարության և հանրային մասնակցության ամրապնդման գործում: 

Մասնակցային բյուջետավորումը հնարավորություն է ընձեռում քաղաքացիներին մասնակցել համայնքային բյուջեի հատկացմանը, ինչը խթանում է որոշումների կայացման գործընթացում համայնքի բնակիչների ավելի մեծ ներգրավվածությունն ու թափանցիկ կառավարումը: 

Համաժողովի մասնակիցները ներկայացրել են այս մոտեցման կարևորությունն ու ազդեցությունը տեղական զարգացման և հանրային վստահության բարձրացման գործում: 

Համաժողովին ներկա են եղել ՀՀ ֆինանսների նախարար Վահե Հովհաննիսյանը, ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը, Հայաստանում Շվեյցարիայի դեսպան Լուկաս Ռոզենկրանցը, Հայաստանում Գերմանիայի Դաշնային Հանրապետության դեսպանության տնտեսական համագործակցության և զարգացման բաժնի ղեկավար Կատրին Բուդեր-Փելցը և այլոք։ 

«Մենք մշտապես կարևորում ենք նման նախաձեռնությունները, քանի որ այն տալիս է իր դրական արդյունքները, և համայնքային կառավարման ոլորտը դառնում է առավել քաղաքացիակենտրոն, հաշվետու, թափանցիկ, նորարար և մասնակցային, ինչը կարևոր նախապայման է որոշումների կայացման գործընթացներում քաղաքացիների ներգրավվածության ամրապնդման և տեղական ժողովրդավարության զարգացման համար»,- համաժողովին ընդգծել է ՏԿԵ նախարարի տեղակալ Վաչե Տերտերյանը։ 

Շվեյցարիայի դեսպան Լուկաս Ռոզենկրանցը նշել է, որ մասնակցային բյուջետավորումը բյուջեի հատկացման մասին որոշումներում քաղաքացիների ներգրավման միջոցով նպաստում է համայնքների զարգացմանը և խթանում սեփականատիրության զգացումը: 

Հայաստանում Գերմանիայի Դաշնային Հանրապետության դեսպանության տնտեսական համագործակցության և զարգացման բաժնի ղեկավար Կատրին Բուդեր-Փելցը շեշտել է, որ մասնակցային բյուջետավորումը կարևոր գործիք է, որը նպաստում է ավելի մեծ թափանցիկության և հաշվետվողականության ապահովմանը: 

Համաժողովի ընթացքում ներկայացվել է նաև միջազգային լավագույն փորձը․ Գերմանիայից, Վրաստանից, Ուկրաինայից և Լեհաստանից ժամանած փորձագետները խոսել են իրենց երկրներում կիրառված արդյունավետ մոդելների և մոտեցումների մասին: 

Միջոցառման նպատակն էր բարձրացնել իրազեկությունը մասնակցային բյուջետավորման առավելությունների մասին, նպաստել մասնակիցների միջև երկխոսությանը, ձևավորել գործընթացի բարելավման առաջարկներ: Համաժողովը միտված էր նաև նպաստելու տարբեր երկրների համայնքապետարանների, հայ և միջազգային փորձագետների միջև համագործակցությանը՝ խթանելու ժողովրդավարական կառավարումն ու հանրային մասնակցությունը: 

Համաժողովն իրականացվել է «Լավ կառավարում հանուն տեղական զարգացման Հարավային Կովկասում» ծրագրի աջակցությամբ: Այն իրականացնում է Գերմանական միջազգային համագործակցության ընկերությունը (GIZ)՝ Գերմանիայի Դաշնային Հանրապետության տնտեսական համագործակցության և զարգացման նախարարության աջակցությամբ և Հայաստանում՝ Շվեյցարիայի զարգացման և համագործակցության գործակալության (ՇԶՀԳ) համաֆինանսավորմամբ: 

Ծրագրի հիմնական գործընկերն է ՀՀ տարածքային կառավարման և ենթակառուցվածքների նախարարությունը։ 2022 թվականից ի վեր ծրագիրն աջակցել է ՀՀ կառավարությանը` «Բաց կառավարման գործընկերություն» նախաձեռնության 2022-24թթ. գործողությունների ծրագրի շրջանակում տեղական մակարդակում մասնակցային բյուջետավորման (ՄԲ) ներդրման գործում։ Իրականացված աշխատանքները ներառել են մեթոդական ուղեցույցի մշակում, ՄԲ հարթակի ներդրում համայնքներում, և գործընթացի փորձարկում չորս համայնքներում՝ Աբովյան, Արմավիր, Աշտարակ և Ջերմուկ: 

Հանրային մասնակցության առավելություններն ընդգծելու, տեղական զարգացումը խթանելու նպատակով այդ համայնքներում ծրագիր համաֆինանսավորել է նաև քաղաքացիների կողմից առաջարկված մի քանի նախաձեռնությունների իրականացումը: Պիլոտային փուլի արդյունավետ իրականացման արդյունքում ՀՀ կառավարությունը որոշում է ընդունել՝ մասնակցային բյուջետավորմամբ ձևավորված ծրագրերի իրականացման նպատակով ՀՀ 2024թ․ պետական բյուջեից չորս պիլոտային համայնքներին 500 միլիոն դրամ հատկացնելու մասին: 

2024թ․ ծրագրի աշխարհագրությունն ընդլայնվել է՝ աջակցելով մասնակցային բյուջետավորման ներդրմանը Հայաստանի ավելի քան 17 համայնքներում: