ՀՀ ՏԿԵ նախարարի տեղակալ Վաչե Տերտերյանն ընդունել է ՄԱԿ-ի Պարենի համաշխարհային ծրագրի (ՊՀԾ) Մերձավոր Արևելքի, Հյուսիսային Աֆրիկայի և Արևելյան Եվրոպայի տարածաշրջանային տնօրենի տեղակալի գլխավորած պատվիրակությանը

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն ընդունել է ՄԱԿ-ի Պարենի համաշխարհային ծրագրի (ՊՀԾ) Մերձավոր Արևելքի, Հյուսիսային Աֆրիկայի և Արևելյան Եվրոպայի տարածաշրջանային տնօրենի տեղակալ Քեյթ Նյուտոնի գլխավորած պատվիրակությանը: 

Նախարարի տեղակալը ողջունել է հյուրերին և խոսել ՀՀ կառավարության և ՄԱԿ-ի Պարենի համաշխարհային ծրագրի (ՊՀԾ) միջև առկա երկար տարիների արդյունավետ համագործակցությունից: 

Քեյթ Նյուտոնը շնորհակալություն հայտնելով ընդունելության համար՝ խոսել է իրականացրած ծրագրերից, առկա խնդիրներից և դրանք լուծելու անհրաժեշտությունից: 

Նյուտոնը նշել է, որ այցի նպատակն է մարզերում տեղում գնահատել ու ծանոթանալ առկա իրավիճակին, խնդիրներին: Վաչե Տերտերյանը ներկայացրել է ՀՀ կառավարության նպատակները՝ կապված դպրոցաշինության հետ և այս համատեքստում կարևորել է «Դպրոցական սնունդ» ծրագրի շարունակականությունը և զարգացումը: 

Նախարարի տեղակալը խոսել է ջրամբարաշինությունից, ոռոգման համակարգի զարգացումից և համայնքային կարևոր այլ հարցերից, ինչպես նաև ԼՂ-ից բռնի տեղահանված մեր հայրենակիցների խնդիրներից, պետության կողմից իրակացվող տարբեր ծրագրերից և նշել, որ ՀՀ ՏԿԵ նախարարությունը միշտ պատրաստակամ է իր իրավասության շրջանակներում շարունակելու, զարգացնելու առկա արդյունավետ համագործակցությունը: 

Հանդիպման ընթացքում քննարկվել են երկուստեք հետաքրքրություն ներկայացնող այլ հարցեր ևս և պայմանավորվածություն է ձեռք բերվել նախարարի տեղակալի հետ այցելել մարզեր՝ տեղում ծանոթանալու, տեսնելու, գնահատելու առկա խնդիրները և իրավիճակը՝ նախանշելու հետագա համագործակցության ուղղությունները: