ՀՀ ՏԿԵ ՆԱԽԱՐԱՐԻ ՏԵՂԱԿԱԼ ՎԱՉԵ ՏԵՐՏԵՐՅԱՆՆ ԸՆԴՈՒՆԵԼ Է ԻՐԱՆԱԿԱՆ «BLUE&P Group» ԸՆԿԵՐՈՒԹՅԱՆ ՆԵՐԿԱՅԱՑՈՒՑԻՉՆԵՐԻՆ

Հ տարածքային կառավարման և ենթակառուցվածքների նախարարի տեղակալ Վաչե Տերտերյանն ընդունել է իրանական «BLUE&P Group» ընկերության ներկայացուցիչներին։ 

Նախարարի տեղակալը ողջունել է հյուրերին և ընդգծել շինարարության ոլորտում Իրանի հետ ունեցած փորձը՝ավելացնելով, որ իրանական նոր ընկերությունների մուտքը Հայաստան էլ ավելի կամրապնդի հայ-իրանական հարևան-բարեկամական հարաբերությունները, ավելի կակտիվացնի երկու երկրների տնտեսական հարաբերությունները:
«BLUE&P Group» ընկերության ներկայացուցիչները շնորհակալություն են հայտնել ընդունելության համար։ Ներկայացրել են ընկերությունը՝ էներգետիկայի, շինարարության, ջրամբարաշինության, ոռոգման և ջրի մաքրման կայանների կառուցման համակարգերի, առևտրի և արտադրության ոլորտներում ունեցած իրենց միջազգային փորձը: 

Վաչե Տերտերյանը և ՀՀ ՏԿԵ նախարարության ջրային կոմիտեի նախագահի տեղակալը հանգամանալից ներկայացրել են ոլորտում ընթացիկ աշխատանքները, խոսել Վեդու և Կապսի ջրամբարների մասին: 

Տերտերյանը խոշոր նախագծերից բացի, կարևորել է նաև միջին և փոքր ջրամբարների, ջրի մաքրման կայանների կառուցման անհրաժեշտությունը, պոմպակայնների և ոռոգման համակարգի արդիականացումը և բարելավումը՝ հիմնված ժամանակակից տեխնոլոգիաների վրա: 

Ներկայացնելով ընդհանուր իրավիճակը՝ Տերտերյանն անդրադարձ է կատարել նաև էներգետիկ և ճանապարհաշինության ոլորտներին, ներկայացնելով տվյալ ոլորտներում առկա ծրագրերը: 

«BLUE&P Group» ընկերության ներկայացուցիչները նշել են, որ մտադրված են ակտիվորեն մասնակցել ջրամբարաշինության, ջրի մաքրման կայանների, էներգետիկ ենթակառուցվածքների կառուցման, ճանապարհաշինության ոլորտներում առաջիկա ծրագրերին: Հանդիպման ընթացքում քննարկվել են երկուստեք հետաքրքրություն ունեցող այլ հարցեր ևս և պայմանավորվածություն է ձեռք բերվել նախանշված ուղղություններով շարունակել համագործակցությունը: