Համայնքների հետ քննարկվել են Համայնքային կառավարման տեղեկատվական համակարգի մշտադիտարկման արդյունքները

2024 թ. հունվարի 15-18-ը ՀՀ տարածքային կառավարման և ենթակառուցվածքների նախարարությունը Գերմանական միջազգային համագործակցության ընկերության (ԳՄՀԸ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի հետ համատեղ իրականացրել են Համայնքային կառավարման տեղեկատվական համակարգի (ՀԿՏՀ) կիրառման շուրջ «Գիտելիքի կառավարում» առցանց միջոցառումների շարք ՀՀ բոլոր մարզերի միավորված համայնքների աշխատակիցների համար: 

Արդեն երկար տարիներ իրականացվող այս միջոցառումների շարքը նպատակ ունի շարունակաբար համագործակցել համայնքների հետ՝ մշտադիտարկման արդյունքների հիման վրա միասին քննարկելու համայնքներում համակարգի կիրառման առաջընթացը և ստեղծելու միջհամայնքային փորձի ու գիտելիքի փոխանակման հարթակ։ 

Բացման խոսքում ՏԿԵՆ տեղական ինքնակառավարման քաղաքականության վարչության պետ Աշոտ Գիլոյանն ընդգծել է նման հանդիպումների պարբերական անցկացման կարևորությունը համայնքներում վարչական կարողությունների զարգացման տեսանկյունից, ինչպես նաև կարևորել է համայնքապետարանների աշխատակիցների կողմից ՏԿԵՆ հեռավար ուսուցման կառավարման հարթակում՝ ՀԿՏՀ-ի վերաբերյա տեղադրված էլեկտրոնային դասընթացի ակտիվ գործածումը։ 

Միջոցառումն իրականացվել է 5 փուլով, որի ընթացքում ՀՀ բոլոր 10 մարզերի 64 համայնքապետարանների ավելի քան 700 ներկայացուցիչների հետ քննարկվել է ծրագրի աջակցությամբ համայնքներում ներդրված Համայնքային կառավարման տեղեկատվական համակարգի կիրառման առկա իրավիճակը, ներկայացվել է մշտադիտարկման արդյունքները, աշխատակիցների միջև իրականացվել է փորձի փոխանակում, ինչպես նաև հավաքագրվել է համակարգի բարելավման վերաբերյալ առաջարկները: 

Միջոցառմանը ներկայացվել է նաև համայնքներում գործող քաղաքացիների սպասարկման գրասենյակներում (ՔՍԳ) մատուցվող ծառայություններից քաղաքացիների գոհունակության հարցման մեթոդաբանությունը, իսկ հարցումները նախատեսված է բոլոր ՔՍԳ-ներում իրականացնել փետրվարի 1-29-ը։ 

Հանդիպմանն անդրադարձ է կատարվել նաև «Մասնակցային բյուջետավորում» գործիքին և կոչ է արվել համայնքապետարաններին ակտիվորեն գործածել այն՝ բնակիչների համար հնարավորություն ստեղծելով իրենց գաղափարները հանրային հարթակի միջոցով ուղարկել համայնքապետարանին, իսկ բարձր թվով ձայներ ստանալու դեպքում՝ իրականացնել։ 

«Լավ կառավարում հանուն տեղական զարգացման Հարավային Կովկասում» ծրագիրն իրականացվում է Գերմանական միջազգային համագործակցության ընկերության (ԳՄՀԸ) կողմից՝ Գերմանիայի տնտեսական համագործակցության և զարգացման դաշնային նախարարության և Շվեյցարիայի զարգացման և համագործակցության գործակալության (ՇԶՀԳ) ցուցաբերած աջակցության շնորհիվ: