ՀԱՄԱՅՆՔՆԵՐՈՒՄ ՄԵԿՆԱՐԿԵԼ Է ՄԱՍՆԱԿՑԱՅԻՆ ԲՅՈՒՋԵՏԱՎՈՐՄԱՆ ՓՈՐՁՆԱԿԱՆ ԾՐԱԳՐԵՐԻ ԻՐԱԿԱՆԱՑՄԱՆ ԳՈՐԾԸՆԹԱՑԸ

Համայնքներում մասնակցային բյուջետավորմամբ ձևավորվող փորձնական ծրագրերի իրականացումն ապահովելու նպատակով՝ ՀՀ Արմավիրի մարզի Արմավիր, ՀՀ Արագածոտնի մարզի Աշտարակ, ՀՀ Վայոց ձորի մարզի Ջերմուկ և ՀՀ Կոտայքի մարզի Աբովյան համայնքներում 2023թ․ դեկտեմբերի 27-ին և 28-ին, ինչպես նաև 2024թ․ հունվարի 11-ին և 12-ին ՀՀ ՏԿԵՆ ֆինանսական, հաշվապահական հաշվառման և համայնքային բյուջեների վարչության համայնքային բյուջեների բաժնի պետ Լորիս Մուրադյանը և ՀՀ ֆինանսների նախարարության գործընկերները մասնակցել են նշյալ համայնքներում մասնակցային բյուջետավորման գործընթացի իրազեկման վերաբերյալ կազմակերպված հանդիպում-քննարկմանը, որում ներգրավված էին նաև համայնքի ակտիվ բնակչությունը, համայնքապետարանի աշխատակիցները, մասնակցային բյուջետավորման գործընթացի կառավարումն ապահովող հանձնաժողովի կազմը, հասարակական կազմակերպությունների ներկայացուցիչները։ 

Քննարկմանը ներկայացվել է համայնքներում մասնակցային բյուջետավորման փորձնական գործընթացի տարբեր փուլերում բնակչության ներգրավման, համագործակցության, նրանց կողմից առաջ քաշվող խնդիրների, ծրագրերի և առաջարկությունների իրականացման հնարավոր ուղիները, ընթացակարգերը, գործընթացի իրականացման հնարավոր խոչընդոտները, ինչպես նաև անհրաժեշտ փաստաթղթերի ձևանմուշները: 

Ծրագերի իրականցումն ապահովելու վերաբերյալ տեղի են ունեցել բովանդակային քննարկումներ և խորհրդատվություններ։ Հանդիպումների ժամանակ կարևորվել է ծրագրի վերաբերյալ սոցիալական հարթակներով բնակիչների իրազեկվածությունը բարձրացնելու հարցը, ինչպես նաև քննարկվել է առաջարկ-նախագծեր ներկայացնող քաղաքացիներին աջակցելու, էլեկտրոնային տարբերակով ծրագրերի ներայացումը դյուրացնելու հարցը: 

Մասնակցային բյուջետավորման ներդրումը թույլ կտա խթանել բնակիչների անմիջական մասնակցությունը համայնքային որոշումների կայացմանը, բարձրացնել տեղական ինքնակառավարման մարմինների նկատմամբ վստահությունն ու բնակիչների քաղաքացիական պատասխանատվությունը: Միևնույն ժամանակ համայնքապետարանները կապահովվեն համապատասխան գործիքակազմով և գիտելիքով՝ խթանելու քաղաքացիների մասնակցայնությունը, որն օգնում է համայնքային իշխանություններին լինել էլ ավելի տեղեկացված և կայացնել ավելի լավ որոշումներ, ինչպես նաև ստիպում է բնակիչներին գիտակցել, որ իրենց ձայնն ու տեսակետները կարևորվում են: 

Անհրաժեշտ է նաև նշել, որ ՀՀ համայնքներում մասնակցային բյուջետավորման գործընթացի խթանման նպատակով ՀՀ 2024թ․ պետական բյուջեյով վերոգրյալ համայնքների համար նախատեսվել է 500 մլն դրամ, որի տրամադրումը մասնակցային ընթացակարգերով իրականացնելու համար ՀՀ կառավարությունը 2023թ. նոյեմբերի 2-ին ընդունել է «ՀՀ համայնքներում մասնակցային բյուջետավորմամբ ձևավորված ծրագրերի իրականացման նպատակով ՀՀ 2024 թվականի պետական բյուջեից համայնքներին սուբվենցիաների տրամադրման կարգը հաստատելու մասին» N 1890-Ն որոշումը։