ՀՀ ՏԿԵ ՆԱԽԱՐԱՐ ԳՆԵԼ ՍԱՆՈՍՅԱՆԻ ՇՆՈՐՀԱՎՈՐԱԿԱՆ ՈՒՂԵՐՁԸ՝ ԷՆԵՐԳԵՏԻԿՆԵՐԻ ՄԱՍՆԱԳԻՏԱԿԱՆ ՏՈՆԻ ԱՌԹԻՎ

Էներգետիկայի ոլորտի հարգելի՛ աշխատակիցներ, 

Ջերմորեն շնորհավորում եմ ձեզ մասնագիտական տոնի՝ էներգետիկի օրվա առթիվ։ Ձեր ամենօրյա աշխատանքով ապահովում եք քաղաքացիներին և տնտեսությանը կենսական նշանակության բարիքով։ Ձեր պատասխանատվության տիրույթում է Հայաստանի էներգետիկ անվտանգությունը։ Էներգետիկ ոլորտը գտնվում է մեր նախարարության անմիջական ուշադրության կենտրոնում: ՀՀ կառավարությունը շարունակում է հետևողական քայլեր ձեռնարկել երկրի էներգետիկ անվտանգության ապահովման ուղղությամբ: 

էլեկտրաէներգետիկական համակարգի բարեփոխումները, արդիականացումը մշտական բնույթ են կրում։ Բարելավում ենք Էներգետիկ ոլորտի օրենսդրական դաշտը, հաստատվել է ՀԱԷԿ-ի 2-րդ էներգաբլոկի շահագործման ժամկետի կրկնակի 2026-2036թթ երկարաձգման ծրագիրը, իրականացվում են բարձրավոլտ ենթակայանների վերազինման, վերակառուցման աշխատանքներ, կառուցվում են նոր ենթակայաններ։ Վերականգնվող էներգիան մեր թիրախային ուղղություններից է և ներկայում գործուն քայլեր են իրականացվում ողջ ներուժի յուրացման ուղղությամբ։ Էներգետիկի աշխատանքը պահանջում է բարձր պատրաստվածություն, պատասխանատվություն և կարգապահություն։ 

Վստահ եմ, որ ձեր մասնագիտական բարձր կարողությունները հետագայում ևս կներդնեք մեր երկրում անկախ, ինքնաբավ և կայուն էներգետիկ համակարգ ունենալու գործում: Ընդունեք իմ անկեղծ շնորհակալական խոսքերը Ձեր բարեխիղճ աշխատանքի և նվիրումի համար։ 

Մաղթում եմ ձեզ առողջություն և բարեկեցություն, անխափան աշխատանք և հաջողություններ ձեր բարդ և կարևոր աշխատանքում։