Սույն թվականի հոկտեմբերի 23-ից 25-ը Ճանապարհային անվտանգության մասնագետների ուսուցողական այցը Իսպանիայի Թագավորության մայրաքաղաք Մադրիդ

Սույն թվականի հոկտեմբերի 23-ից 25-ը ԵՄ ԹԱՅԵՔՍ ծրագրի շրջանակներում և Իսպանիայի Թագավորության ներքին գործերի նախարարության Երթևեկության գլխավոր տնօրինության հրավերով՝ տեղի ունեցավ ՀՀ տարածքային կառավարման և ենթակառուցվածքների նախարարության, «Ճանապարհային դեպարտամենտ» հիմնադրամի, Ճարտարապետության և շինարարության Հայաստանի ազգային համալսարանի ներկայացուցիչների այցը՝ Իսպանիայի Թագավորության մայրաքաղաք Մադրիդ: 

Ուսուցողական այցի հիմնական նպատակն էր ճանապարհային անվտանգության աուդիտի ձեռնարկի մշակման նպատակով Իսպանիայի փորձի ուսումնասիրումը։ Այցի ընթացքում Իսպանիայի ճանապարհային անվտանգության մասնագետները ներկայացրել են Իսպանիայում ճանապարհային անվտանգության կառավարման համակարգը, ճանապարհային աուդիտորների վերապատրաստման և որակավորման կարգը, iRAP համակարգով իրականացվող ճանապարհային անվտանգության ամբողջական գնահատման և դասակարգման մեթոդիկան, ճանապարհային անվտանգության ստուգումների իրականացումը և այլն։ 

Այցի ընթացքում հանդիպումներ են տեղի ունեցել Իսպանիայի Ճանապարհային երթևեկության գլխավոր տնօրինության պաշտոնյաների և մասնագետների, CPC երթևեկության և տրանսպորտի ուսումնասիրություններ իրականացնող կազմակերպության և Մադրիդի քաղաքապետարանի ներկայացուցիչների հետ, որի ընթացքում քննարկվել են Իսպանիայում ճանապարհային անվտանգության մակարդակի բարձրացման նպատակով իրականացվող միջոցառումները, այդ թվում՝ նաև երթևեկության մասնակիցների խոցելի խմբերի անվտանգության ապահովման ուղղությամբ և ճանապարհի վթարավտանգ հատվածներում իրականացվող միջոցառումները: 

Միաժամանակ մասնակիցները այցելել են Ճանապարհային երթևեկության վերահսկման և դիտարկման օպերատիվ կենտրոն, Մադրիդի կենտրոնական փողոցներ, A-2 (Մադրիդ) և M-300 (Alcalá de Henares), ինչպես նաև N-320 Գվադալախարա-Տորելագունա ճանապարներ, որի ընթացքում ճանապարհային անվտանգության մասնագետները ներկայացրել են տվյալ ճանապարհների վտանգավոր տեղամասերում անվտանգության բարելավման նպատակով իրականացված միջամտությունները: Քննարկվել է նաև Իսպանիայի բնակավայրերի որոշակի փողոցներում 30 կմ/ժամ թույլատրելի առավելագույն արագության ներդրման արդյունավետությունը: 

Հանդիպումների ընթացքում պայմանավորվածություն է ձեռք բերվել հետագա համագործակցության վերաբերյալ։