ՀՀ ՏԿԵ նախարարի տեղակալ Վաչե Տերտերյանը մասնակցել է «‎Կանաչ հանրային կառավարում» համաժողովին

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը ապրիլի 26-ին մասնակցել է Ստրասբուրգում կայացած «‎Կանաչ հանրային կառավարում» համաժողովին։ 

Իր ելույթի խոսքում նախարարի տեղակալը անդրադարձել է հանրային տնտեսության կազմակերպման և կայուն զարգացում ապահովելու համատեքստում ՏԻՄ-երի դերակատարմանը՝ նշելով, որ կլիմայի փոփոխության ազդեցությունը, տնտեսական զարգացման դժվարությունները մեծացնում են ՏԻՄ-երի մասնագիտական կարողությունների զարգացման և տարբեր երկրների փորձի փոխանակման անհրաժեշտությունը։ 

Համաժողովի ընթացքում Վաչե Տերտերյանը ներկայացրել է վերջին տարիներին Հայաստանում իրականացված մի քանի նախաձեռնություններ․ «Էյ Թի Փի» բարեգործական հիմնադրամի, «Ջինիշյան» հիշատակի հիմնադրամի և «Էներգետիկայի հայկական գործակալություն» հիմնադրամի կողմից Եվրոպական միության ֆինանսավորմամբ իրականացվող «ԵՄ-ն Շրջակա միջավայրի համար. Կանաչ համայնք՝ դիմակայուն ապագա» ծրագիրի շրջանակներում ՀՀ Շիրակի, Լոռու և Տավուշի մարզերի թիրախային 15 համայնքներում «Ուրբան» կայուն զարգացման հիմնադրամի կողմից էներգաարդյունավետության, այլընտրանքային էներգիայի, թափոնների կառավարման և կլիմայի փոփոխությանը հարմարվողականության ոլորտներում իրականացված կարիքի գնահատման արդյունքում մշակվել է «Կանաչ» կառավարման մոդել, 2023թ. ապրիլից իրականացվում է «Բնական ռեսուրսների կառավարում», «Էներգաարդյունավետություն և վերականգնվող էներգիա», «Թափոնների կառավարում», ««Կանաչ տրանսպորտի» ընդհանուր նկարագրություն Էլեկտրաէներգիայի և Վերականգնվող էներգիայի տեսանկյունից», «Կանաչապատ տարածքների խնամք և կառավարում», «Հանրային-մասնավոր համագործակցության (ՀՄՀ) զարգացում», «Բնապահպանական կրթություն և իրազեկվածության բարձրացում», «Էլեկտրոնային կառավարում», «Ֆինանսների կայուն կառավարում և ֆոնդհայթայթում» և «Ծրագրերի մոնիթորինգ» թեմաներով դասընթացների շարք։ 

Եզրափակելով ելույթը՝ նախարարի տեղակալը վստահեցրել է, որ համաժողովի ընթացքում բարձրաձայնված շատ գաղափարներ կդառնան Հայաստանում իրականացվող ապագա ծրագրերի մի մասը։