ՀՀ ՏԿԵ նախարարի տեղակալ Վաչե Տերտերյանը հանդիպել է «Սոլ Ժես Էներջի» ընկերության գործադիր տնօրեն Արմեն Սեդեֆյանի հետ

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը հանդիպել է «Սոլ Ժես Էներջի» ընկերության գործադիր տնօրեն Արմեն Սեդեֆյանի հետ: 

Հայ-ֆրանսիական տնտեսական համագործակցության շրջանակներում նախատեսվում է իրականացնել նորարարական վերականգնվող հիբրիդային էներգիայի արտադրության ծրագիր՝ ՀՀ Լոռու մարզի Փամբակ համայնքի Դեբետ գյուղի «Հայաստանի մանուկներ» բարեգործական հիմնադրամի կենտրոնի տարածքում։ 

Նախարարի տեղակալը ողջունել է հյուրերին և կարևոր համարել նման նախաձեռնությունները, քանի որ ծրագիրն իր մեջ ներառում է նաև նորագույն հետազոտությունների և զարգացման ինստիտուտի ստեղծում: Վաչե Տերտերյանը շեշտել է, որ ՀՀ կառավարության նպատակն է բարձրացնել էներգետիկ անվտանգության մակարդակը՝ նվազեցնելով ածխածնի արտանետումների ծավալները՝ որպես երկրի կայուն զարգացման կենսական անհրաժեշտություն, և ձևավորել կանաչ տնտեսություն, այդ թվում՝ արդյունավետ և նորարարական էներգետիկ լուծումների մշակման միջոցով: 

«Սոլ Ժես Էներջի» ընկերության գործադիր տնօրեն Արմեն Սեդեֆյանը շնորհակալություն է հայտնել ընդունելության համար և նշել, որ ընկերությունն ունի նորարարական լուծումների մշակման, ֆինանսավորման և կառավարման ոլորտում ճանաչված փորձ, այդ թվում՝ արևային և ջրածնային էներգետիկայի ոլորտում։ 

Սեդեֆյանը կարևորել է երկու երկրների միջև տնտեսական և առևտրային հարաբերությունները ամրապնդելու համար նման ծրագրերի իրականացումը, քանի որ Ֆրանսիան և Հայաստանը ներգրավված են տնտեսական համագործակցության ամուր գործընթացում: Հանդիպամ ավարտին ՀՀ ՏԿԵ նախարարության և «Սոլ Ժես Էներջի» ընկերության միջև կնքվել է փոխըմբռնման հուշագիր: