Տեղի է ունեցել ՀՀ ՏԿԵ նախարարին կից հասարակական խորհրդի երկրորդ նիստը

Դեկտեմբերի 21-ին տեղի է ունեցել ՀՀ տարածքային կառավարման և ենթակառուցվածքների նախարարին կից հասարակական խորհրդի երկրորդ նիստը: Խորհրդի անդամներից բացի նիստին մասնակցել են նաև նախարարի տեղակալ Հովհաննես Հարությունյանը, «Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանը, նախարարության Էներգետիկայի վարչության պետ Տիգրան Մելքոնյանը, Տեղական ինքնակառավարման վարչության տեղական ինքնակառավարման հարցերի բաժնի պետ Կարեն Բակոյանը և նախարարի օգնական Լիանա Հովհաննիսյանը, ով համակարգում է հասարակական խորհրդի հետ աշխատանքները:

Ողջունելով նիստի մասնակիցներին՝ հասարակական խորհրդի նախագահ, ՀՀ տարածքային կառավարման և ենթակառուցվածքների նախարար Գնել Սանոսյանը շնորհակալություն է հայտնել խորհրդի անդամներին նախարարության հետ համագործակցելու համար՝ կարևորելով հասարակական կազմակերպությունների կարծիքը նախարարության նախաձեռնությունների վերաբերյալ և վստահեցրել, որ նրանց առաջարկները և դիտողությունները հաշվի են առնվում որոշումներ կայացնելու ժամանակ։ 

Գնել Սանոսյանը համոզմունք է հայտնել, որ համատեղ աշխատանքն արդեն իսկ արդյունավետ է և հիմնված է կառուցողական փոխգործակցության վրա։ Խորհրդի անդամների առաջարկությամբ քննարկվել է Հայաստանի էներգետիկ զարգացման տեսլականի մասին ավելի մեծ կազմով՝ փորձագետների, մասնագետների, գործարարների և այլ շահագրգիռ կողմերի մասնակությամբ հավաք-քննարկում կազմակերպելու անհրաժեշտությունը: Խորհրդի նախագահի համաձայնությամբ 2023թ-ի առաջին եռամսյակում կկազմակերպվի էներգետիկ ոլորտին նվիրված համաժողով: 

Մեկ այլ առաջարկությամբ, որոշվեց համայնքների գործարար ներդրումների հնարավորությունների քարտեզագրում կատարել, աշխատանքային խմբում ներգրավել խորհրդի անդամների, նախարարության և այլ գերատեսչության աշխատակիցների: 

Այնուհետև «Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանը հակիրճ ներկայացրել է 2022 թվականի ընթացքում հիմնադրամի կողմից իրականացված ճանապարհաշինարարական աշխատանքը, հիմնական ձեռքբերումները, անդրադարձել աշխատանքների որակը և վերահսկողություն ապահովող գործընթացներին, առկա խնդիրներին և դրանք լուծլու գործընթացներին: Գոռ Ավետիսյանը ներկայացրել է, որ ՀՀ քաղաքաշինության կոմիտեի հետ քննարկում են շինարարության գործընթացը վերահսկելու նոր մեթոդները, խորհրդի անդամներից ցանկություն են հայտնել ներգրվել այդ գործընթացում և իրենք ևս առաջարկություններ անելու հնարավորություն ստանան: 

Տեղական ինքնակառավարման վարչության տեղական ինքնակառավարման հարցերի բաժնի պետ Կարեն Բակոյանը զեկուցել է համայնքների կառավարման արդի խնդիրների՝ որոշ մասնագետների բացակայության, աշխատողների մասնագիտական համատեղելիության, միջհամայնքային կապերի, համայնքների խոշորացման արդյունավետության գնահատման չափորոշիչների մասին: Մասնավորապես նշել է, որ համայնքապետարանի աշխատակազմերում որոշ ուղղություներով մասնագետների բացակայությունը զգացնել է տալիս մանավանդ բազմապրոֆիլ խնդիրների օպերատիվ լուծման համատեքստում, որոնք այս կամ այն փուլում անպայմանորեն ծառանում են համայնքի առջև։ Համայնքների միավորման արդյունավետության մասին խոսելիս մասնավորապես նշել է, խոշորացումն էականորեն բարձրացրել է համայնքների ֆինանսական հնարավորությունները լուծելու երկար տարիներ անլուծելի թվացող բազմաթիվ խնդիրներ։ Խորհրդի անդամները հնարվորություն են ունեցել զեկուցվող հարցերի շրջանակից դուրս ևս հարցեր ուղղել: