ՀՀ ՏԿԵ նախարարի տեղակալ Վաչե Տերտերյանը մասնակցել է դոնորների համակարգման ամենամյա նիստին

«Տեղական ինքնակառավարման համակարգի բարելավումը Հայաստանում» ծրագրի շրջանակում 2022 թ. դեկտեմբերի 7-ին տեղի է ունեցել դոնորների համակարգման ամենամյա նիստը: 

Հանդիպմանը մասնակցել են Տարածքային կառավարման և ենթակառուցվածքների նախարարության (ՏԿԵՆ), տեղական ինքնակառավարման ոլորտում գործող դոնոր և այլ միջազգային կազմակերպությունների, ինչպես նաև Հայաստանում ներկայացված օտարերկրյա առաքելությունների ներկայացուցիչներ։ Միջոցառումը նախագահել է ՏԿԵ նախարարի տեղակալ պարոն Վաչե Տերտերյանը, իսկ բացման խոսքով հանդես են եկել ՀՀ-ում Շվեյցարիայի փոխդեսպան, Հարավային Կովկասում շվեյցարական համագործակցության գրասենյակի տարածաշրջանային տնօրենի տեղակալ պարոն Վերներ Թութը և Գերմանիայի միջազգային համագործակցության ընկերության (ԳՄՀԸ/GIZ) հայաստանյան գրասենյակի ղեկավար տիկին Մադլեն Ռաուշենբերգերը: 

Միջոցառմանը մասնակցել են բազմաթիվ կառույցների ներկայացուցիչներ, մասնավորապես՝ Եվրոպական միության պատվիրակություն, Համաշխարհային բանկ, ՄԱԿ-ի Զարգացման ծրագիր (ՄԱԶԾ), Եվրոպայի խորհուրդ (ԵԽ), Զարգացման ֆրանսիական գործակալություն (AFD), Ավստրիական զարգացման գործակալություն (ADA), Շվեդիայի Տեղական իշխանությունների և տարածաշրջանների ասոցիացիա (SALAR) և ԱՄՆ Միջազգային զարգացման գործակալությունից (ԱՄՆ ՄԶԳ)։ Միջոցառումը կազմակերպվել էր ՀՀ ՏԿԵՆ-ի և ԳՄՀԸ-ի կողմից։ 

Հանդիպման հիմնական շեշտադրումն ուղղված էր Հայաստանում իրականացվող բարեփոխումների ներկա վիճակին՝ նպատակ ունենալով ամրապնդել տեղական ինքնակառավարումը և հաջողված վարչատարածքային բարեփոխումների համատեքստում ճանապարհ հարթել լիազորությունների ապակենտրոնացման համար: Հանդիպումը միջազգային գործընկերների միջև համագործակցության ուղղությունների հատկորոշման հնարավորություն է ընձեռել, մասնավորապես ապակենտրոնացման, Հայաստանի նոր միավորված համայնքներում հանրային ծառայությունների մատուցման և տեղական տնտեսական զարգացման ոլորտներում: 

Ֆրիբուրգի համալսարանի Ֆեդերալիզմի ինստիտուտի ղեկավար պարոն Սոերեն Քեյլը ներկայացրել է Գերմանիայի և Շվեյցարիայի կառավարությունների կողմից ֆինանսավորվող, ԳՄՀԸ-ի, ՄԱԶԾ-ի և ԵԽ-ի կողմից իրականացվող «Տեղական ինքնակառավարման համակարգի բարելավումը Հայաստանում» ծրագրի (2019-2023 թթ.) միջանկյալ գնահատման արդյունքները ՝ կենտրոնանալով ծրագրի հիմնական ձեռքբերումների, աշխատանքների ներդաշնակ իրականացման և արդյունավետության վրա, ինչպես նաև տրամադրեց առաջարկներ ծրագրի հետագա իրականացման համար: 

Հարց ու պատասխանից հետո մասնակիցները պայմանավորվածություն են ձեռք բերել ևս մեկ հանդիպում կազմակերպել 2023 թվականի սկզբին՝ ավելի մանրամասն քննարկելու միասնական մոտեցումների և գործողությունների ձևավորումը Հայաստանում տեղական ինքնակառավարման բարեփոխումներին լիարժեք աջակցություն ցուցաբերելու համար: