ՏԿԵ նախարար Գնել Սանոսյանն այցելել է Սպիտակ և հարգանքի տուրք մատուցել երկրաշարժի զոհերի հիշատակին

ՀՀ տարածքային կառավարման և ենթակառուցվածքների նախարար Գնել Սանոսյանն այսօր՝ դեկտեմբերի 7-ին, 1988 թ․ ավերիչ երկրաշարժի 34-րդ տարելիցի կապակցությամբ այցելել է Սպիտակ քաղաք։ Սպիտակում էին նաև ԱԻ նախարար Արմեն Փամբուխչյանը, Հայաստանում Ճապոնիայի արտակարգ և լիազոր դեսպան Մասանորի Ֆուկուշիման, Լոռու մարզպետ Արամ Խաչատրյանը, Սպիտակի համայնքապետ Քաջայր Նիկողոսյանը և այլ պաշտոնատար անձիք։ 1988 թ. Սպիտակի երկրաշարժի զոհերի հիշատակին նվիրված խաչքարի մոտ կատարվել է հոգեհանգստյան կարգ՝ ի հիշատակ աղետի զոհերի։ Ներկաները ծաղիկներ են խոնարհել հուշակոթողին և Ճապոնիայի ահեղ ցունամիի զոհերի հիշատակին նվիրված հուշարձանին։ «Այն, ինչ տեղի ունեցավ 34 տարի առաջ մեկ բառով կարելի է կոչել սահմռկեցուցիչ: 1988 թվականի աղետը մեծ հետք է թողել ինչպես մեր ժողովրդի հոգում, այնպես էլ երկրի տնտեսության վրա, որի վերականգնման համար մեր պետությունն իրականում անցել է շատ բարդ ճանապարհ։ Այսօր մենք երախտիքով ենք հիշում բոլոր նրանց, ովքեր ցուցաբերեցին անշահախնդիր մարդասիրություն և դժվար պահին մեզ ձեռք մեկնեցին։ Ճապոնիայի կառավարությունն ու Ճապոնիայի բարեկամ ժողովուրդը առաջիններից էին, որ օգնության ձեռք մեկնեցին Հայաստանին և մինչ օրս տարբեր ծրագրերով աջակցում են մեզ և մեր ժողովրդի կողքին են։ Աշխարհագրորեն իրարից այդքան հեռու տեղակայված մեր երկու երկրները նման են ճակատագրով, քանի որ երկուսն էլ զգացել են բնական աղետի կործանիչ հետևանքները։ Ընդունեք իմ խոնարհումը հազարավոր անմեղ զոհերի հիշատակին»,-ասել է նախարար Սանոսյանը։ 

Նախարարն այցելել է նաև Վանաձորի Սուրբ Մարիամ Աստվածածին եկեղեցի և ծաղիկներ խոնարհել երկրաշարժի զոհերին նվիրված խաչքարի մոտ։ Սրբոց Նահատակաց պուրակում՝ խաչքարի մոտ, կատարվել է նաև հոգեհանգստյան կարգ՝ ի հիշատակ երկրաշարժի զոհերի։