Տեղի է ունեցել ՀՀ-ում Համաշխարհային բանկի կողմից իրականացված «Կենսական նշանակության ճանապարհային ցանցի բարելավման ծրագրի» փակման արարողությունը

Այսօր տեղի է ունեցել Հայաստանի Հանրապետությունում Համաշխարհային բանկի (ՀԲ) կողմից իրականացված «Կենսական նշանակության ճանապարհային ցանցի բարելավման ծրագրի» փակման արարողությունը։ Վերջին 10 տարվա ընթացքում ՀԲ-ի աջակցությամբ Ծրագրի շրջանակներում հանրապետության 175 համայնքներում վերականգնվել են շուրջ 453 կմ ընդհանուր երկարությամբ ճանապարհներ, որոնք նպաստել են գյուղական բնակչության սոցիալ-տնտեսական կյանքի բարելավմանը, միջհամայնքային կապերի աշխուժացմանը և ճանապարհային անվտանգության մակարդակի բարձրացմանը։

 ՀՀ տարածքային կառավարման և ենթակառուցվածքների նախարար Գնել Սանոսյանը միջոցառման ժամանակ` բացման խոսքում, ծրագիրը գնահատել է շատ արդյունավետ և շնորհակալություն հայտնել Համաշխարհային բանկին, ծրագրի ղեկավարներին, մասնակիցներին, շինարարներին այն կյանքի կոչելու համար։ «Դրանք իսկապես կենսական նշանակության ճանապարհներ էին, մեր բնակավայրերը դրանց կարիքը չափազանց ունեին»,-ընդգծել է նախարարը։ 

Միջոցառման ժամանակ եյույթով հանդես է եկել նաև ՀԲ Հայաստանի գրասենյակի տնօրեն Կարոլին Գեգինատը՝ընդգծելով գյուղական համայնքների հասանելիության կարևորությունը։ Վերջինիս խոսքով ծրագիրն էական նշանակություն է ունեցել նաև աշխատատեղերի ապահովման առումով։ Այս ծրագրի իրականացման ընթացքում մոտ 4000 ժամանակավոր աշխատատեղ է ստեղծվել: «Ճանապարհների կառուցումն օգնել է նաև համայնքների զարգացմանը: Ճանապարհների կառուցման շնորհիվ նվազում են նաև տրանսպորտային ծախսերը, ներդրումներ են ներգրավվել, զարգացել է տեղական տնտեսությունները։ Հասանելիության բարձր մակարդակը խթանել է այլ ներդրումներ հատկապես տուրիզմի և անշաժ գույքի ոլորտում»,-նշել է Կարոլին Գեգինատը։