ՏԿԵՆ և ԳՄՀԸ համագործակցությամբ կայացել է ՀՀ հարավային և կենտրոնական համայնքների տնտեսական զարգացման համաժողովը

Նոյեմբերի 7-ին ՀՀ տարածքային կառավարման և ենթակառուցվածքների նախարարության (ՏԿԵՆ) և Գերմանիայի միջազգային համագործակցության ընկերության (ԳՄՀԸ) հետ համագործակցությամբ Գորիսում կայացել է ՀՀ հարավային և կենտրոնական համայնքների տնտեսական զարգացման համաժողովը։ 

Մեկտեղելով Սյունիքի, Վայոց Ձորի, Արարատի և Արմավիրի մարզերի համայնքների և մարզպետարանների շուրջ 70 ներկայացուցիչների՝ համաժողովը հնարավորություն է ստեղծել արծարծելու համայնքներում տնտեսական զարգացման խնդիրները, առկա հնարավորությունները և իրականացված աշխատանքները։ 

Տարածքային կառավարման և ենթակառուցվածքների նախարարի տեղակալ Վաչե Տերտերյանի, ՀՀ-ում Շվեյցարիայի փոխդեսպան Վերներ Թութի և ԳՄՀԸ կողմից իրականացվող «Լավ կառավարում հանուն տեղական զարգացման» ծրագրի խորհրդատու Արմեն Քեշիշյանի ողջույնի խոսքերից հետո ներկայացվել են ՏԿԵՆ տեղական ինքնակառավարման քաղաքականության վարչության պետ Աշոտ Գիլոյանի կողմից ներկայացվել են համայնքների զարգացման ռազմավարական և գործառնական պլանավորման գործիքները (Զարգացման հնգամյա ծրագիր, Տարեկան աշխատանքային պլան), համայնքների տնտեսական զարգացման ոլորտում ՏԻՄ-երի լիազորությունները և խնդիրները, ինչպես նաև վերջին երկու տարիների ընթացքում համայնքային ենթակառուցվածքների զարգացման սուբվենցիոն ծրագրի շրջանակներում իրականացված միջոցառումները։ 

Համաժողովը համայնքապետարանների ներկայացուցիչներին հնարավորություն է տվել ծանոթանալ համայնքների տնտեսական զարգացման Աշխատանքային խմբի (ԱԽ) գործունեությանը, հիմնական գործառույթներին և իրականացված աշխատանքներին, որոնց թվում կարևոր տեղ է զբաղեցնում Գերմանիայի Դաշնության և Շվեյցարիայի կառավարությունների, ինչպես նաև ՀՀ համայնքների համաֆինանսավորմամբ գործող «Համավարակի հետեւանքների մեղմմանն ուղղված դրամաշնորհային հիմնադրամի» աշխատանքների համակարգումը։ 

Հիմնադրամի շրջանակներում իրականացվող 21 բազմաբնույթ դրամաշնորհային ծրագրերը (ընտրված ավելի քան 200 հայտերից) նպատակ ունեն շահառու համայնքներում ստեղծել տնտեսական ակտիվության հնարավորություններ և նպաստել ձեռներեցության համար առավել բարենպաստ միջավայրի ձևավորմանը։ Համաժողովին ներկայացվել են չորս համայնքներում իրականացված դրամաշնորհային ծրագրեր (Արենի, Սիսիան, Տեղ, Գորիս)՝ իրենց արդյունքներով, դժվարություններով և սերտած դասերով։