Կանայք բեմում «Ուժը ներսում». TEDxYerevanSalon

«Ուժը՝ ներսում» խորագրով TEDxYerevanSalon միջոցառումը տեղի ունեցավ 2022 թ․ նոյեմբերի 4-ին Երևանում: Միջոցառումը հարթակ տրամադրեց խոսնակներին՝ լսարանին ներկայացնելու իրենց պատմությունները՝ ընդգծելով ներքին ուժի և ճկունության կառուցման կարևորությունը։ 

Կոնֆերանսին իրենց ելույթներով հանդես եկող հինգ կանայք և մի տղամարդ համընդհանուր աջակցություն ցուցաբերելու կարևորության վառ ապացույցն են: Նրանք անհատներ են, ովքեր ոչ միայն հասել են իրենց երազանքներին ու նպատակներին, այլև ջանք չեն խնայել իրենցից հետո եկողների համար ճանապարհ հարթելու, կրթելու, ուղղորդելու գործում։ Նրանք սիրով աջակցում են բոլորին, ովքեր այս կամ այն կերպ կիսում են իրենց կյանքի ուղին։ 

Միջոցառմանը բացման խոսքով հանդես եկան Գերմանիայի միջազգային համագործակցության ընկերության (ԳՄՀԸ/GIZ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի հայաստանյան թիմի ղեկավար Պիեռ Բոնիֆասին և ծրագրի խորհրդատու Լիկա Մկրտչյանը: «Նմանատիպ միջոցառումները միտված են հայ հասարակության մեջ կանանց առաջնորդությունը խթանելու և ամբողջ երկրի աղջիկներին և դեռահասներին ոգեշնչելու համար», - ասաց պարոն Բոնիֆասին: 

Անուշ Մանուչարյանը՝ Brainee և grow edutainment-ի համահիմնադիրը, ներկայացավ սեփական վախերի հետ ընկերանալու մասին իր ելույթով։ Արենիի համայնքապետարանի տնտեսական զարգացման գլխավոր տնօրեն Զեմֆիրա Հարությունյանը, ով ներգրավված է հասարակությանը օգնելու մի շարք ծրագրերում, ներկայացնում է մարդասիրությունը: 

Սևանի համայնքապետարանի աշխատակազմի քարտուղար Արմենուհի Ղուկասյանը խոսեց մեր ներսում ամեն ինչ վերահսկելու մասին՝ աշխարհը կառավարել փորձելու փոխարեն։ Չարենցավանի համայնքապետարանի հասարակայնության հետ կապերի վարչության պետ, «Իրազեկ կանայք, հզոր համայնքի» համահիմնադիր Սաթենիկ Բալաբեկյանն իր 8-ամյա որդուն համարում է իր լավագույն ընկերը, ումից էլ կարևոր դասեր է քաղել՝ նրա դաստիարակությամբ զբաղվելիս:

Անակնկալ ելույթով հանդես եկավ Սերգեյ Վարդանյանը, ով խոսեց կանանց հզորացման վերաբերյալ տղամարդու տեսանկյունից: Ելույթը շատ խորիմաստ էր, այն ներկայացնում էր կանանց աշխարհը Սերգեյի աչքերով։ Կոնֆերանսն ամփոփող վերջին բանախոսը Տաթևիկ Ռևազյանն էր` Քաղավիացիայի վարչության աշխարհում ամենաերիտասարդ գլխավոր տնօրենը: Նա նշեց, որ չնայած կանանց առջև ծառացած դժվարություններին, կարևոր է չկենտրոնանալ կին լինելու վրա և դա չընկալել որպես սահմանափակում, այլ հակառակը՝ ընդունել որպես առավելություն։ 

Նման հատկանշական թեմաներ բարձրաձայնելով՝ բանախոսները նպատակ ունեն խրախուսել հասարակությանը՝ հատկապես կանանց:Ամբողջ աշխարհում կանայք բախվում են սոցիալական և մշակութային բարդությունների և անարդար մարտահրավերների: TEDxYerevanSalon-ի խոսնակները բեմ դուրս եկան` ցույց տալու, որ ամեն ինչ հնարավոր է, և երբեք ուշ չէ սկսել ամեն ինչ նորից: 

TEDxYerevan թիմը Հայաստանում կազմակերպում է TEDx ձևաչափի համաժողովներ 2010 թվականից, և սա թվով երրորդ TEDxYerevan համաժողովն է, որն ուղղված էր կանանց առնչվող թեմաների բարձաձայնմանը։ Միջոցառմանն աջակցել է Գերմանիայի միջազգային համագործակցության ընկերության (ԳՄՀԸ/GIZ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագիրը՝ Գերմանիայի տնտեսական համագործակցության և զարգացման դաշնային նախարարության և Շվեյցարիայի զարգացման և համագործակցության գործակալության (ՇԶՀԳ) ցուցաբերած աջակցության շնորհիվ: Ծրագիրն իրականացվում է հիմնական քաղաքական գործընկերոջ՝ ՀՀ տարածքային կառավարման և ենթակառուցվածքների նախարարության (ՏԿԵՆ) հետ սերտ համակարգմամբ: