Մեկնարկել է «Հայաստանում թափոնների կառավարման քաղաքականություն» 4-ամյա ծրագիրը

Հոկտեմբերի 28-ին Հայաստանի ամերիկյան համալսարանում (ՀԱՀ) Յակոբեան բնապահպանական կենտրոնը, ՀՀ շրջակա միջավայրի (ՇՄ) նախարարությունը և ՀՀ տարածքային կառավարման և ենթակառուցվածքների (ՏԿԵ) նախարարությունը համատեղ մեկնարեցին «Հայաստանում թափոնների կառավարման քաղաքականություն» Շվեդիայի կողմից ֆինանսավորվող 4-ամյա ծրագիրը։ 

Ծրագրի ղեկավար Հարություն Ալպետյանը ներկայացրեց ծրագրի երեք հիմնական նպատակները, որոնք են՝ տրամադրել աջակցություն ՀՀ ՇՄ նախարարությանը՝ ներդնելու Արտադրողի ընդլայնված պատասխանատվության համակարգ ՝ հիմնված ԵՄ լավագույն փորձի վրա, տրամադրել աջակցություն ՀՀ ՏԿԵ նախարարությանը՝ Սևան քաղաքում և այլ պիլոտային համայնքներում ներդնելու սկզբնաղբյուրում թափոնների տարանջատման համակարգ և աջակցել ոլորտում կարողությունների զարգացմանը և ընդլայնմանը։ 

Թափոնների կառավարման քաղաքականության կարևորությանն անդրադառնալով՝ ՀՀ ՏԿԵ նախարարի տեղակալ Վաչե Տերտերյանը շեշտեց Ծրագրի կարևորությունը Հայաստանի կառավարության որդեգրած՝ աղբահանության և կոշտ թափոնների կառավարման ոլորտի բարելավման ու զարգացման առաջնահերթության տեսանկյունից և ընդգծեց Շվեդիայի կառավարության հետ երկարամյա հաջողված համագործակցությունը, ինչպես նաև Հայաստանի ամերիկյան համալսարանի հետ համատեղ իրականացված բազմաթիվ հաջողված ծրագրերն ու ուսումնասիրությունները։ Միաժամանակ, կարևորելով ՀՀ համայնքներում աղբահանության և կոշտ թափոնների կառավարման ինտեգրված համակարրգի ներդնումը՝ Վ․Տերտերյանի կողմից ներկայացվեց նաև ծրագրի շրջանակներում ՀՀ Գեղարքունիքի մարզի Սևան համայնքի՝ որպես ծրագրի պիլոտային համայնք, ընտրելու հիմնավորումները, մասնավորապես այն փաստը, որ ՎԶԵԲ-ի աջակցությամբ իրականացվող «Կոտայքի և Գեղարքունիքի ԿԿԹԿ ծրագրի հետ համատեղ՝ այն ամբողջական կդարձնի տարածաշրջանում կոշտ թափոնների կառավարման ինտեգրված համակարգի ներդրման գործընթացը, դրա հետ մեկտեղ հաշվի առնելով համայնքի աշխարհագրական դիրքը և զբոսաշրջիկների հոսքը։ 

Նշվեց նաև, որ ծրագրի ընթացքում ձեռքբերված հաջողված փորձը նախատեսվում է կիրառել նաև հանրապետության մյուս համայնքներում։ «Ծրագրի կողմից մշակվող գործիքները և մոտեցումները կօգնեն կառավարությանը կատարել իր պարտավորությունները և առաջ տանել կանաչ տնտեսության օրակարգը», - հավելեց Հարություն Ալպետյանը։