ՀՀ ՏԿԵ նախարարի տեղակալ Արմեն Սիմոնյանը ընդունել է «Յանդեքս» ընկերության ներկայացուցիչներին

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը ընդունել է «Յանդեքս» ընկերության ներկայացուցիչներին՝ ընկերության արտասահմանյան կառավարությունների հետ կապերի ղեկավար Մաքսիմ Կոզլովի գլխավորությամբ։ 

Արմեն Սիմոնյանը ողջունել է հյուրերին և կարևորել ընկերության մուտքը հայկական շուկա՝ որպես օնլայն հարթակում տաքսի ծառայություն մատուցող կազմակերպություն։ 

Մաքսիմ Կոզլովը շնորհակալություն է հայտնել ընդունելության համար՝ ընդգծելով, որ հայկական շուկան առանցքային նշանակություն ունի ընկերության համար ոչ միայն տաքսի ծառայությունների մատուցման, այլև տարբեր ոլորտներում նոր բիզնես ծրագրերի իրականացման հարցերում։ Այդ է վկայում 2017 թվականից Գյումրիում գործող Յանդեքս ծրագրավորման դպրոցը, որը հնարավորություն է ընձեռում Շիրակի մարզի 9-11-րդ դասարանների աշակերտներին ծանոթանալ ծրագրավորմանը եւ ՏՏ ոլորտում աշխատելու հեռանկարներ ունենալ։ 

Ընկերության ներկայացուցիչը զուգահեռներ է անցկացրել հայկական և այլ շուկաների միջև, ցույց տվել հաջողությունների հասնելու բանաձևերը՝ կիրառված տարբեր երկրներում և ընդլայնման դինամիկան։ 

Կողմերը քննարկել են հյուրերի ներկայացրած նոր ծրագրերի փաթեթը, որը իր մեջ ներառում է նոր լիցքավորման կայանների գործարկում, ինչպես նաև անդրադարձ է կատարվել օնլայն հարթակներում տաքսի ծառայություն մատուցող կազմակերպությունների հարկման օրենքի նախագծի դրույթներին։ Վերջինիս վերաբերյալ Կոզլովը ներկայացրել է սեփական տեսլականն ու առաջարկները, իսկ նախարարի տեղակալը տեղեկացրել է, որ առաջարկները կքննարկվեն համապատասխան ստորաբաժանումների հետ, և արդյունքների մասին կհայտնեն հյուրերին։