ՏԿԵ նախարարը մասնակցել է հայ-վրացական «Բարեկամության» կամրջի պաշտոնական բացման արարողությանը

Հայաստանի և Վրաստանի վարչապետներ Նիկոլ Փաշինյանի և Իրակլի Ղարիբաշվիլիի գլխավորությամբ այսօր ՀՀ տարածքային կառավարման և ենթակառուցվածքների նախարար Գնել Սանոսյանը մասնակցել է Հայ-վրացական «Բարեկամության» կամրջի պաշտոնական բացման արարողությանը։ Այսուհետ երկու երկրների միջև ուղևորափոխադրումներն ու բեռնափոխադրումները կիրականացվեն նոր կամրջով, որի կառուցումը հայ-վրացական համատեղ ծրագիր է։ 

Կամրջի կառուցումը ֆինանսավորվել է Վերակառուցման և զարգացման եվրոպական բանկի և Հայաստանի ու Վրաստանի կառավարությունների կողմից։ Շինարարության մեկնարկը տրվել է 2021 թվականի մայիսին։ 

Կառույցը բաղկացած է իրարից 1 մետր հեռավորության վրա գտնվող երկու զուգահեռ կամուրջներից, յուրաքանչյուր կամրջի լայնությունը 11.85մ է, կամրջի երկարությունը՝ 160մ: «Բարեկամություն» անունը ստացած կամուրջն ունի արտաքին լուսավորություն և ջրահեռացման համակարգ, երկու կողմից մոտեցնող ճանապարհներ, հետիոտնի համար նախատեսված մայթեր։ 

Կամրջի բացման արարողությունից հետո պաշտոնյաներն այցելել են Արևելյան մաքսատուն-վարչության Բագրատաշենի մաքսային-կետ բաժին, շրջայց կատարել, ծանոթացել Բաժնի գործունեությանը, սահմանահատման գործընթացի կազմակերպմանը, մուտքի և ելքի ընթացակարգի առանձնահատկություններին, ինչպես նաև քաղաքացիներին մատուցվող ծառայություններին: