ՏԿԵ նախարարն ընդունել է «LG Sonic» ընկերության ներկայացուցիչներին

ՀՀ տարածքային կառավարման և ենթակառուցվածքների նախարար Գնել Սանոսյանը Շրջակա միջավայրի նախարար Հակոբ Սիմիդյանի հետ ընդունել է «LG Sonic» ընկերության ներկայացուցիչներին։ 

Ընկերությունը մասնագիտացված է ջրամբարների, լճերի մաքրման աշխատանքներում և ունի մշակված մեթոդ, որը թույլ է տալիս ջուրը մաքել ջրիմուռներից, կայունացնել ջրի PH-ը, թափանցելիությունը և թթվածնի լուծելիությունը ջրում, որի արդյունքում էլ ջրում էկոհամակարգը վերականգնվում է։ Ընկերությունն աշխատում է աշխարհի 69 երկրում, որտեղ առկա են հանքաարդյունաբերության, էներգիայի արտադրության և այլ պատճառներով ախտոտված ջրեր։ 

Նախարար Սանոսյանն ընդգծել է, որ ընկերության աշխատանքը Հայաստանին հետաքրքիր է, քանի որ Սևանա լճում նույնպես առկա է ջրի աղտոտվածության և ջրիմուռների «ծաղկման» խնդիր և ողջունելի կլինի նշված մեթոդի կիրառման արդյունքում լուծել այդ խնդիրը։ 

«LG Sonic» ընկերության գործադիր տնօրեն Յուսեֆ Յուսեֆը մանրամասն ներկայացրել է իրենց ընկերության մշակած տեխնոլոգիան, ինչպես նաև ներկայացրել է աշխարհի մի քանի երկրներում տեխնոլոգիայի կիրառման արդյունքում ջրի մաքրման օրինակներ։ 

Եվ ՏԿԵ, և ՇՄ նախարարները պատրաստակամություն են հայտնել ընկերությանը փոխանցել Սևանա լճի վերաբերյալ բոլոր անհրաժեշտ ուսումնասիրությունների տվյալները, այց կազմակերպել և տեղում քննարկել Սևանը մաքրելու նշված տեխնոլոգիան։