Հայաստանի Ազգային Ագրարային համալսարանում կայացել է ՀՀ Բնական կերհանդակների կայուն կառավարմանն ուղղված ծրագրերի համակարգման հարթակի 9-րդ աշխատաժողովը

Մայիսի 13-ին, Հայաստանի Ազգային Ագրարային Համալսարանում կայացել է «ՀՀ բնական կերհանդակների՝ արոտավայրերի և խոտհարքների կայուն կառավարմանն ուղղված ծրագրերի համակարգման հարթակ»-ի 9-րդ աշխատաժողովը, որին մասնակցել են, ՀՀ Տարածքային կառավարման և ենթակառուցվածքների, ՀՀ Էկոնոմիկայի, ՀՀ Շրջակա միջավայրի նախարարությունների, ինչպես նաև գիտական կառույցների, տեղական և միջազգային հասարակական կազմակերպությունների ներկայացուցիչներ: Հարթակի գործունեությանը զգալի աջակցություն է ցուցաբերել ՀՀ Տարածքային կառավարման և ենթակառուցվածքների նախարարությունը: Բնական կերհանդակների արդյունավետ կառավարումը, պահպանումը, ճիշտ շահագործումը անմիջականորեն կապված են ՏԻՄ-երի հետ, վերջիններիս աշխատանքի հետ, և այդ առումով նախարարությունը նպաստում է այս ոլորտում ստեղծել բարենպաստ միջավայր և կարևորում է Հարթակի գործունեությունը: Միջոցառման սկզբում մասնակիցներին ողջունել է ՀԱԱՀ ուսումնական գծով պրոռեկտոր Հրաչյա Զաքոյանը: Իր խոսքում Զաքոյանը կարևորել է Հարթակի գործունեությունը, մասնավորապես արոտավայրերի կայուն կառավարմանն ուղղված նախաձեռնությունները: Ողջույնի խոսքով հանդես է եկել և բեղմնավոր աշխատանք է մաղթել Համաշխարհային Բանկի գյուղատնտեսության ավագ մասնագետ, ՀԳՌԿՄ -2 ծրագրի պատասխանատու Արուսյակ Ալավերդյանը՝ իր խոսքում շատ կարևորելով ՀԲ մասնակցությունը Հարթակի աշխատաժողովին, քանի որ այն հնարավորություններ է ստեղծում լուծումներ տալու բնական կերհանդակների կառավարման ոլորտում առաջացած խնդիրներին: Խոսնակները ողջունել են Հարթակի հերթական Աշխատաժողովը կազմակերպելու նախաձեռնությունը, ինչպես նաև կարևորել են Հարթակի գործունեությունը, որի հիմնական ուղղությունները միտված են ՀՀ բնական կերհանդակների կայուն կառավարմանն ու վերջիններիս ուղղությամբ իրականացվող ծրագրերին: Աշխատաժողովի ընթացքում ՀԳՌԿՄ-2 ծրագրի ներկայացուցիչ Կ. Թորոսյանը ներկայացրել է ՀԳՌԿՄ-2 ծրագրի արդյունքները և ձեռքբերումները, այնուհետև Վ. Հովհաննիսյանը ներկայացրել է ՌԶԳ ՀԿ կողմից իրականացվող անասնապահության զարգացման ծրագրերի արդյունքներն ու նոր՝ «Անասնապահության Զարգացում Հայաստանում՝ հարավ-հյուսիս 2» ծրագրի մեկնարկը: Զեկույցով հանդես եկավ նաև արոտավայրերի կառավարման փորձագետ Գ. Թովմասյանը՝ ներկայացնելով «ՀՀ Սյունիքի մարզի Գորիս, Տեղ և Տաթև համայնքներից՝ դեպի Գորայք համայնքի արոտավայրեր անասնագլխաքանակի արոտահանման նախրաքաշի երթուղու տեղորոշում և այն սպասարկող ենթակառուցվածքների կառուցման» նախագիծը: Աշխատաժողովի մասնակիցները բարձր են գնահատել այս ընթացքում արոտավայրերի բարելավման ուղղությամբ իրականացված ծրագրերի դրական արդյունքները, ինչպես նաև կարևորել են նախրաքարշի նախագիծը կյանքի կոչելուն միտված քայլերն ու շահագրգիռ կազմակերպությունների դերը: ՀՀ Տարածքային կառավարման և ենթակառուցվածքների նախարարության նախաձեռնությամբ և ԳՄՀԸ ԷԿՈսերվ ծրագրի միջոցով իրականացված արոտավայրերի կայուն կառավարմանը միտված օրենսդրական բարեփոխումների նախագծերը ներկայացրել է իրավական խորհրդատու Վ. Պետրոսյանը: Օրենսդրական նախագծերի ընդունումը բարենպաստ միջավայր կստեղծի ՏԻՄ-երի կողմից արոտավայրերի արդյունավետ կառավարման ապահովման ինստիտուցիոնալ մակարդակում: Միջոցառման մասնակիցները կարևորել են և պատրաստակամություն են հայտնել միացյալ ուժերով բարձրաձայնելու տվյալ պահին ոլորտում առկա բացթողումները և ուղիներ մշակել դրանք լրացնելու ուղղությամբ: