ՀՀ ՏԿԵ նախարարի տեղակալ Արմեն Սիմոնյանը ընդունել է «ԵՄ-ն՝ բիզնեսի համար» նախաձեռնության նորարարական տուրիզմի և տեխնոլոգիաների զարգացման թիմի ղեկավար Վիլհելմ Հյուգոյին

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը մայիսի 11-ին ընդունել է «Գերմանիայի միջազգային համագործակցության գործակալության» «ԵՄ-ն՝ բիզնեսի համար» նախաձեռնության նորարարական տուրիզմի և տեխնոլոգիաների զարգացման թիմի ղեկավար Վիլհելմ Հյուգոյի գլխավորած պատվիրակությանը։

Նախարարի տեղակալը ողջունել է հյուրերին՝ նշելով, որ «Գերմանիայի միջազգային համագործակցության գործակալության» հետ ՏԿԵ նախարարությունը սերտ համագործակցում է՝ մասնավորապես օդային տրանսպորտի ոլորտում։

Վիլհելմ Հյուգոն շնորհակալություն է հայտնել հանդիպման համար՝ հավելելով, որ «ԵՄ-ն՝ բիզնեսի համար» ծրագիրը ուղղված է նորարարական տուրիզմի, տեխնոլոգիաների և տեղական տնտեսական զարգացմանը Հայաստանի Հանրապետությունում։ Հյուգոն նշել է, որ ծրագիրը, որի արժեքը 15 մլն եվրո է, մեկնարկել է 2020 թվականին և կավարտվի 2023 թվականի վերջին, սակայն ներկայում բանակցություններ են տարվում ծրագրի երկարաձգման համար։

Հանդիպման ընթացքում հյուրերը հանդես են եկել առաջարկություններով.

• Տեխնիկական աջակցություն ավիացիայի ոլորտին,

• Շահագրգիռ կողմերի կարողությունների զարգացում,

• Օժանդակություն ավիացիայի կենսունակության ապահովմանը,

• Թվայնացման խթանում,

• Միջազգային փորձի ուսումնասիրություն և կիրառում հայաստանյան շուկայում։

Փոխնախարարը դրական է գնահատել գործընկերների ներկայացրած առաջարկները՝ հավելելով, որ բարեփոխումները պետք է լինեն համակարգային և կրեն պարբերական բնույթ ցանկալի արդյունքին հասնելու համար։

Հանդիպման ավարին կողմերը պայմանավորվածություն են ձեռք բերել շարունակել քննարկումները։