Նորություններ

Այցեր ԵՎ ելույթներ

ՏԿԱԻ նախարարը մասնակցել է Վայոց ձորի մարզխորհրդի նիստին

31.01.2015

Հունվարի 30-ին ՀՀ ՏԿԱԻ նախարար Արմեն Երիցյանը մասնակցեց Վայոց ձորի մարզում կայացած մարզխորհրդի նիստին: Մարզխորդի նիստը ներառում էր երեք օրակարգային հարցեր`ամառային և ձմեռային զորակոչի արդյունքների վերաբերյալ զեկույց, մարզպետարանի կառուցվածքային ստորաբաժանումների ղեկավարների կողմից հաշվետու ժամանակահատվածում կատարված աշխատանքի մասին հաշվետվություն, ՀՀ օրենսդրական և գերատեսչական իրավական ակտերում տեղ գտած փոփոխությունների վերաբերյալ տեղեկատվության տրամադրում:

Վայոց ձորի մարզի Վայք, Եղեգնաձոր քաղաքների զինկոմները զեկույցներ ներկայացրեցին զինակոչի վերաբերյալ: Այնուհետև ելույթ ունեցավ 4-րդ բանակային կորպուսի հրամանատար, գեներալ մայոր Անդրանիկ Մակարյանը, որը իր խոսքում շեշտեց բանակային կորպուսի և տեղական ինքնակառավարման մարմինների սերտ համագործակցության կարևորությունը հատկապես՝ զինված ուժերը պայմանագրային զինծառայողներով համալրելու հարցում: Անդրանիկ Մակարյանը պաշտպանության նախարար Սեյրան Օհանյանի անունից <<Նելսոն Ստեփանյան>> գերատեսչական մեդալով պարգևատրեց Վայոց ձորի նախկին մարզպետ Սամվել Սարգսյանին:

Հաշվետու ժամանակահատվածի վերաբերյալ զեկույցներով հանդես եկան մարզպետարանի ստորաբաժանումների ղեկավարները՝ առանձին-առանձին անդրադառնալով իրենց ոլորտներում կատարված աշխատանքներին: Խոսվեց նաև բացթողումների մասին. ՏԿԱԻ նախարարը ստորաբաժանումների ղեկավարների ուշադրությունը հրավիրեց ոլորտներում առկա կոնկրետ խնդիրների վրա՝ խորհրդակցությունը տեղափոխելով ավելի գործնական հարթություն: Բարձրացվեց ջրի խնդիրը, որի բացակայության պայմաններում հնարավոր չի լինում մշակել հսկայական տարածքներ, մարզը ունի գազամատակարարման, ճանապարհների բարեկարգման, առողջապահական ծառայությունների բարելավման և բազմաթիվ այլ խնդիրներ: Արմեն Երիցյանը խոստացավ խնդիրները քննարկել պատկան մարմինների հետ և գտնել համապատասխան լուծումներ:

Օրակարգային հաջորդ կետի համաձայն՝ ՀՀ օրենսդրության մեջ կատարված փոփոխությունների վերաբերյալ հաղորդմամբ հանդես եկավ մարզպետարանի իրավաբանական բաժնի պետ Նարինե Մաղաքյանը: Իրենց ոլորտներին վերաբերվող պարզաբանումներով հանդես եկան հանդիպմանը հրավիրված ՀՀ աշխատանքի և սոցիալական հարցերի նախարարության զբաղվածության պետական գործակալության պետ Արտակ Մանգասարյանը և ՀՀ առողջապահության նախարարության բժշկական օգնության քաղաքականության վարչության պետ Ծաղիկ Վարդանյանը, ելույթ ունեցավ Վայոց ձորի մարզպետ Հարություն Սարգսյանը:

ՀՀ ՏԿԱԻ նախարար Արմեն Երիցյանը իր եզրափակիչ խոսքում նշեց, որ մշտապես կանգնած է լինելու համայնքների կողքին և փորձելու է քայլ առ քայլ լուծել առկա խնդիրները: Նախարարի խոսքով՝ մարզում կուտակված բազմաթիվ խնդիրների լուծման ուղղությամբ եղած միջոցների հաշվին արդեն իսկ կատարվում են աշխատանքներ և արդյունքները շուտով տեսանելի կլինեն: Արմեն Երիցյանը նշեց, որ մեկ առ մեկ այցելելու է համայնքներ և տեղում է ծանոթանալու առկա խնդիրներին, որոնց լուծման ճանապարհին նախարարը ակնկալում է և՛ համայնքի ղեկավարների, և՛ բնակչության աջակցությունը:

← Վերադառնալ ցուցակին

Թեժ գիծ

Հեռ. (010)51-13-79

Բաժանորդագրում նորություններին