Նորություններ

Լրատվություն

Ընդերքօգտագործողների հետ քննարկվել է օգտակար հանածոների պաշարների շարժի վերաբերյալ տարեկան հաշվետվությունների փոփոխությունների նախագիծը

19.08.2021

ՀՀ տարածքային կառավարման և ենթակառուցվածքների նախարարի տեղակալի պաշտոնակատար Լիլիա Շուշանյանի գլխավորությամբ այսօր շահագրգիռ ընկերությունների ներկայացուցիչներին ներկայացվել է կառավարության 2012 թվականի N 1348-ն որոշման մեջ փոփոխություն կատարելու նախագիծը, որով նախատեսվում են ընդերքօգտագործողների կողմից հանքավայրերի պաշարների շարժի վերաբերյալ տարեկան հաշվետվության ձևի փոփոխություններ:
Լիլիա Շուշանյանը նշել է, որ  հանդիպման նպատակը նախագծի շրջանառման դեռևս նախնական փուլում ընդերքօգտագործողների կարծիքը լսելն է, համատեղ աշխատելը և նրանց նախատեսվող փոփոխություններով աշխատելուն նախապատրաստելը։
Փոխնախարարի խոսքով՝ նախքան որոշման նախագծի մշակումը, ուսումնասիրվել են ընդերքօգտագործողների կողմից ներկայացվող տարեկան հաշվետվությունները և հանքավայրի պաշարների վերաբերյալ ներկայացվող տեղեկությունները (տվյալ տարվա ընթացքում արդյունահանված պաշարներ, կորուստներ, հավելաճ և այլն), որոնք օբյեկտիվ և սուբյեկտիվ պատճառներով թերի են եղել։ Այդուհանդերձ, տարիներ շարունակ այս որակի տեղեկությունների հավաքագրումը դառնում է ինքնանպատակ և զրկում պետությանն ու ընդերքօգտագործողին համակարգված և հիմնավոր տվյալների ձևավորումից, ինչն անընդունելի է պետական կառավարման տեսանկյունից։
Բացի դրանից՝ հաշվետվության աղյուսակային մասերը զուրկ են եղել հիմնավորումներից, գծագրական նյութերից և բացատրական մասից։ Լ․Շուշանյանի խոսքով՝ առաջարկվող փոփոխություններով մշակվող տեղեկատվությունը հետագայում կօգնեն թե ընդերքօգտագործողներին պաշարների վերագնահատման կամ ընդերքաբանական իրավունքի հետ կապված այլ գործընթացներում, և թե լիազոր մարմնին՝ իր աշխատանքներում։

Հանդիպմանը մասնակցել են մետաղական օգտակար պաշարներ արդյունահանող մի շարք՝ «Զանգեզուրի պղնձամոլիբդենային կոմբինատ» ՓԲ, «Թեղուտ» ՓԲ, «Չաարատ Կապան» ՓԲ, «ՄԼ Մայնինգ» ՍՊ, «Մեղրաձոր գոլդ» ՍՊ, «Ախթալայի ԼՀԿ» ՓԲ, «Ագարակի ՊՄԿ» ՓԲ, «Սագամար» ՓԲ, «Արարատ ցեմենտ» ՓԲ, «Ա.Ա.Բ. Պրոեկտ» ՍՊ ընկերությունների ներկայացուցիչներ։

«Հանրապետական երկրաբանական ֆոնդ» ՊՈԱԿ-ի տնօրեն Հ․ Մովսիսյանի կողմից ներկայացվել է նախագիծը, որով, մասնավորապես սահմանվում են ընդերքօգտագործողների կողմից օգտակար հանածոների պաշարների շարժի վերաբերյալ տարեկան հաշվետվությունը ներկայացնելու կարգը, պինդ օգտակար հանածոների և ստորերկրյա ջրերի պաշարների շարժի վերաբերյալ տարեկան հաշվետվության ձևերը՝ համապատասխան հավելվածներով։
Նախագծով հստակեցվել է ընդերքօգտագործողների կողմից օգտակար հանածոների պաշարների վերաբերյալ տարեկան հաշվետվությունների ներկայացման ժամկետը՝ սահմանվելով ոչ ուշ, քան մինչև հաշվետու տարվան հաջորդող տարվա փետրվարի 20-ը։Նախատեսվում է նաև, որ հաշվետվության աղյուսակային մասերը պետք է հիմնավորվեն՝ գծապատկերներով և բացատրագրերով։

Ընդերքօգտագործման ընկերությունների ներկայացուցիչները հիմնականում համաձայնել են առաջարկվող փոփոխությունների հիմնավորվածության հետ։ Հանդիպման ընթացքում առաջարկվել է նաև խոշոր հանքավայրերի դեպքում որոշ գծագրական նյութեր, ելնելով մեծ ծավալներից, ներկայացնել բացառապես էլեկտրոնային տարբերակով, ինչը ընդունվել է ՏԿԵ նախարարության  կողմից։
Պայմանավորվածություն է ձեռք բերվել առաջիկայում լրացուցիչ դիտարկումներ ունենալու դեպքում դրանք ներկայացնել ՏԿԵՆ՝ հետագա քննարկման և լրամշակումներ իրականացնելու նպատակով։

 

 

← Վերադառնալ ցուցակին

Թեժ գիծ

Հեռ. (010)51-13-79

Բաժանորդագրում նորություններին